adminYiNtatheli kaMthunywa
LOKHU zibambe imilomo yangaphansi njalo zididekile izakhamizi zesigabeni seSomgolo, eLupane ngemva kokuba omunye umntwana wesinye isakhamuzi sakule indawo etholakale endenda esizibeni ebusuku kungaziwa ukuthi ungene njani.
Impicabadala le yenzakale emavikini amabili aphelileyo lapho uMthulisi Moyo obhujelwe khona ngumntwana oleminyaka emihlanu ngendlela engacaciyo okusuka kusolise kucatshangelwe ukuthi kungabe kukhona olesandla okufeni kwalo umntwana.
UMthunywa uphuthume wayafika kule indawo wenelisa ukuxoxisana lesinye isakhamuzi sakule indawo uNkosazana Idah Ndlovu oveze ukuthi indaba le iyasolisa kakhulu.
“Indlela umntwana lo afe ngayo iyethusa ngoba watholakala emanzini endenda sokusebusuku yena etshayise esikolo ngehola lesibili emini. Okusuka kungidanise yikuthi isiziba lesi sihlala sigcwele abantu njalo lenkomo zinatha khona okokuthi kwakufanele ukuthi abonakale kusasemasinya.
“Okunye njalo okumangalisayo yikuthi umntwana lo watholakala engaqumbanga manzi okutshengisa ukuthi kabulawanga ngamanzi,” kutsho uNkszn Ndlovu.
UMnumzana Mthulisi Moyo onguyise walo umntwana uchaze ukuthi kalamathe.
“Izinto ziyenzakala njalo kutsho ukuthi umdali ubesethandile ukuthi kwenzeke njalo,” kuchaza uMnu Moyo.
Ekhuluma lentatheli usobhuku wakule indawo uMnumzana Albert Moyo onguyisemkhulu walo umntwana olandise ngokufa kwakhe.
“Umntwana wafa isihluku sibili ngoba ngabona ilanga selizatshona engakafiki ekhaya ngaqonda esikolo ngathola bethi kakho usuke emini. Kuthe kunjalo ngahamba loyise sidinga sabikela abantu labo baqala ukudinga kwaze kwathi ngo 9 ebusuku sabona imota ilepholisa lasibuza esikudingayo salitshela lathi kulento enjengomuntu eliyibone layisola emini esizibeni lisiya eLupane.
“Kuthe kunjalo sasuka-ke sayamthola umntwana endenda phezu kwamanzi, ipholisa leli lathi okwenze langakhangeli obekusemanzini yikuthi bekulabafana ababili eduze lalesisiziba okutshengisa ukuthi bambona umntwana lo bafihla,” kuveza uMnu Moyo.
Online Reporter