admin
Thokozile Mbedzi
ZILOKHU zidideke amakhanda izakhamizi zesigabeni seDawi eMasvingo kulandela ukuzwa ngenye indoda okutholakale kugcwele igazi embhedeni wayo andubana isidumbu sayo siyotholakala phakathi komgodi wamanzi.
Umuyi uPianos Muungani oleminyaka engu-56 yokuzalwa kubikwa wasala ngekhaya indodana yakhe isiya kwelusa mhlaka 27 kunyanga edluleyo.
Kubikwa indodana yakhe ithe iphenduka yathola uyise engekho ekhaya yacabanga ukuthi mhlawumbe uye etshwaleni.
Kubikwa ngosuku olulandelayo indodana kaMuungani yathi inanzelela ukuthi lokhu ingamboni uyise yazisa omakhelwane baqala ukumdinga.
Omunye walabo ababekhona ekhuluma lentatheli kaMthunywa uNkosazana Barbra Moyo uthe umntaka Muungani wasuka ngekhaya esiyakwelusa watshiya uyise ezihlalele emthunzini kodwa wathi ephenduka kazange ambone wacabanga ukuthi uye etshwaleni.
“Wahamba wayazilalela ekuseni wangena endlini kayise yokulala wafica kungcwele igazi engutsheni zakhe kodwa engekho okwenza wazisa omakhelwane baqala ukudinga umkhondo wakhe,” kulandisa uMoyo.
Uqhubekele phambili esithi indodana yakhe yathi isiya kukha amanzi emgodini ongaba ngamamitha angu-50 usuka ngakibo yathola uyise ephakathi.
“Isidumbu sikaMuungani sathi sikhitshwa sasilamanxeba esabekayo.
Isikhulumi samapholisa esabelweni seMasvingo ulnspector Kudakwashe Dewa ebuzwa ngodaba lolu uthe solufikile ehofisini yabo.
“Sichwayisisa udaba lwendoda eyalala ingabonakali yatholakala iphakathi komgodi ilamanxeba emzimbeni.
“Sicela ongabe elolwazi lokuthi kwenzakalani abikele amapholisa aseduzane laye,” kuphetha uInsp Dewa.
Online Reporter