Online Reporter
KUTHOLAKALE umbala womuntu oqunyiweyo, obutshe kancane njalo uthandelwe ngamabhanditshi, endaweni yokulahlela izibi eChitungwiza ngoLwesibili.
Eceleni kombala lo kutholakale njalo amajekiseni, amagilavu, amabhanditshi kanye lezinye izibi zezempilakahle eceleni kombala lo.
Lokhu sekubangele ukuthi iziphathamandla zisole ukuthi kungenzeka kube lokunganakekeli kwemisebenzi yisibhedlela esizimeleyo esisebenza kulelidolobho.
Amapholisa athi umbala lo kungenzeka ukuthi ubusuka ekuhlinzweni lapho kususwa ingxenye yomzimba, njalo esikhundleni sokuthi uthunyelwe ukuyalahlwa ngendlela efaneleyo, njengokutshiswa endaweni ekhethekileyo, walahlwa ngokungekho emthethweni endaweni yokulahlela izibi.
Ingxenye yomzimba le itholwe ngowesifazane ongaziwayo, obedinga amapulasitiki angasetshenziswa futhi athengiswe. Wazisa isisebenzi sendawo yokulahlela izibi esikamanisipala weChitungwiza, sona esabiza iziphathamandla ukuthi zizobona okwenzakeleyo.
“Ekufikeni kwethu ukuzothatha amapulasitiki esiwathengisayo lamuhla, sithole ingxenye yomzimba le endaweni,” kutsho enye indoda ebikhona lapho.
“Sisola kakhulu ukuthi esinye sezibhedlela esizimeleyo yiso esenze lokhu.”
Isikhulumi samapholisa esabelweni seHarare, u-Inspector Luckmore Chakanza, uqinisekisile ukuthi loludaba luyaphenywa.
“Amapholisa aphenya udaba olumayelana lengxenye yomzimba womuntu eyalahlwa endaweni yokulahlela izibi eChitungwiza,” utsho njalo.
“Endaweni yesehlakalo, amapholisa athole umbala womuntu obotshwe ngamabhanditshi.”
U-Insp Chakanza uthe umlenze lo ububonakala ungowomuntu omdala njalo wawutshiwe kancane.
Wengeze wathi ama-syringe asetshenzisiweyo, amagilavu, amabhanditshi kanye lezinye izibi zezempilakahle lazo bezikhona lapho.
