Online Reporter
KUQAKATHEKILE ukuthi abantwana bathole usekelo oluvela ebazalini babo. Lokhu kubenza ukuthi baphumelele njalo basebenze nzima ngoba besazi ukuthi abazali babo bayabasekela kulokho abakwenzayo.
Izikolo zivuliwe ngoLwesibili, abanye sebesiyabhala imihloliso yabo yokuphela komnyaka.
Yebo isikolo siqakathekile ngoba kulezi insuku kunzima, akuphileki nxa umuntu engawadlanga amabala. Lokhu sokubangela ukuthi abadala bathi umntwana esikolo ulanda ukuyafunda kuphela.
Abanye baze balise abantwana ukuphatheka kumidlalo yesikolo ngoba besithi kuzamphambanisa ezifundweni zakhe.
Abantu badalwa ngendlela ezehlukeneyo ayisuye wonke umuntu owaphiwa ingqondo zamabala ezibukhali, abanye amabala ayabe engekho egazini lakhe kodwa elesiphiwo kwezemidlalo ezitshiyeneyo.
Kuyadingeka ke ukuthi njengabazali siziphe isikhathi sokukhulumisana labantwabethu ukuze sazi lapho okudinga ukuthi sibasekele khona ukuze baphumelele.
Nxa njengomzali ungehluleka ukusekela umntanakho ngalokho olakho kutsho uyabe uzibulalela umntanakho.
Kuyadanisa ukuthi kulabazali abatshaya baphose babulale abantwababo ngenxa yokuthi kabenzi kuhle ezifundweni zabo kukanti umntwana uyabe engakuphiwanga.
Okunye okumangalisayo ngabazali laba abathi bona umntwana uya esikolo ukuyafunda kodwa engamthengelanga ingwalo zesikolo ezeneleyo kodwa ephethe emfuqela esikolo. Kambe umntwana uyabe ezaphumelela athini nxa kulokunye okusilelayo ukuze aphumelele.
Esikhathini esinengi abantwana abafuqelwa esikolo bengaphiwa ingwalo ezeneleyo yibo abatshaya kakhulu isikolo uthole bedlula bonke abantwana ngesikolo baze baphiwe izicoco zokubakhuthaza ukuthi baqhubekele phambili besebenza nzima.
Umntwana uyabe efuna ukuthi umzali abuye azomsekela ngelanga lokuphiwa kwakhe isicoco kodwa uthola umzali engazihluphi athi yena uyabe esenza eminye imisebenzi. Kambe sibili mzali ufuna umntanakho aphumelele njani kumbe azimisele njani nxa wena ungamsekeli njalo ungamtshengisi ukuthi ulothando lalokho akwenzayo.
Lalaba abenza okwemidlalo asibathengeleni impahla eziqondileyo emdlalweni yabo siphinde siyebabukela emncintswanen yabo. Lokhu kubangela ukuthi umntwana asebenze nzima ukuze aphumelele ngamandla.
Okunye asisekeleni abantwana badala emisebenzini yabo abayikhethayo. Abanye ngabenza imisebenzi yezandla.
Kwesinye isikhathi uyathola umntwana ethanda ukudweba, ukuthunga athi etshela abazali ukuthi yikho afuna ukuphila ngakho uzwe umzali esithi “ubona angathi kuza kusa ngaphi khonokho?”
Bazali kasisekeleni abantwabethu ngoba awukwazi ukuthi ufuqwa yini ukuze akhethe lokho akukhethileyo. Vele abantu abafanani ngoba omunye ungumbalisi, omunye ngumanjinela, omunye ngumongikazi kodwa lokho akutsho ukuthi umntanakho laye uzaba yilokho oyikho khona. Umuntu lomuntu ulendlela yakhe ayikhethayo.
