Online Reporter
Nkosilathi Sibanda
UHULUMENDE usenikeze iziqinti ezinhlanu zeMatabeleland North amabhasi azasetshenziswa ukuthwala izisebenzi zomphakathi, ngenjongo yokuthuthukisa isimo sezisebenzi sokusebenza okuzenza ukuthi zifike emsebenzini ngesikhathi.
Amabhasi la, anikwe ugatsha lwePublic Service Commission, azasetshenziswa eziqintini zeTsholotsho, Bubi, Mguza, Lupane leNkayi.
Ekhuluma ngesikhathi sokunikezwa kwamabhasi la, uMphathintambo obona ngokwenzakala esabelweni seMatabeleland North uRichard Moyo, uthe inyathelo leli litshengisa ukuzimisela kukaHulumende ukuthuthukisa impilo zezisebenzi zikaHulumende.
UMphathintambo uMoyo ubonge uMongameli Emmerson Mnangagwa loHulumende ngokugcina isithembiso sokulondoloza lokuthuthukisa inhlalakahle yezisebenzi zikaHulumende.
Uthe ukuhanjiswa kwamabhasi eziqintini kuzasiza kakhulu izisebenzi, ikakhulu labo abahamba amabanga amade besuka emakhaya besiya endaweni zabo zokusebenza.
“UHulumende wethu uqhubeka esebenza nzima ukuthuthukisa isimo sokusebenza ebantwini. Amabhasi la azakwenza kube lula ukuthi izisebenzi zifike emsebenzini yazo ngendlela elula njalo ngesikhathi,” kutsho uMoyo.
Uphinde wathi ukuthuthukiswa kwendlela izisebenzi ezihamba ngayo kuzakwenza ukuthi zincedise uzulu ngcono.
