admin
Buhlebenkosi Gaule
ABANTWANA abaleminyaka emithathu kusiya kwelitshumi elokitshini leNketa koBulawayo sebevulelwe indlu yoqoqo (library) ngenhloso yokubakhuthaza ukuthi babe lomfutho wokuhlala befunda izingwalo.
IKhansili yakoBulawayo iphathisane lenhlanganiso yeNgilandi iLondon Based Book Aid kanye leEdward Ndlovu Memorial Trust bavula iOpen Door Children’s Corner.
Kubikwa ukuvulwa kwe-library le yikufezeka kwesivumelwano abasenza mhlaka 20 Zibandlela kuwonalo umnyaka sokuthi abantwana abahlala emalokitshini amadala bathole ingwalo zokubala.
Isikhulumi seKhansili yakoBulawayo, uNkosikazi Nesisa Mpofu uthe ukusungulwa kwe-library yabantwana kuyaqala koBulawayo njalo loluhlelo kukhangelelwe ukuba lusabalaliswe kwamanye amalokitshi amadala akoBulawayo agoqela iTshabalala, iNjube, iPumula laseNkulumane.
UMthunywa uzwe ukuba i-Open Door Children’s Corner ihlose ukuncedisa abantwana abancane labontanga abasakhulayo ukuba bathole indawo ezabenza benelise ukubala lokufunda ukubala besesebancane ukuze bakhule belomkhuba wokubala.
UNkkz Mpofu uqhubekele phambili echaza ukuba iBook Aid International incedise ngokutshiyeneyo okugoqela imali yokuncedisa ama-library, izaphatheka njalo ngezifundo kubaphathi bezikolo, ababalisi lalabo abancedisayo ema-library.
“Inhlanganiso yeBook Aid iphe isipho samabhuku angu-2 500 abantwana abancane abangakangeni esikolo lezingwalo zabasakhulayo, lemali engange-1 000 Pounds ezancedisa ukulungisa i-library njalo lezifundo ezizafundiswa labo okumele bafundiswe kabanzi ukuphatha abantwana abancane,” kutsho uNkosazana Mpofu.
UNkosazana Jessica Faulkner onguMkhokheli weBook Aid International uchaze ukuba inhlanganiso yakhe ikholwa ukuba ingwalo eziqondileyo ziyenelisa ukuguqula impilo yomuntu.
“Thina abehlanganiso yeLondon Based Book Aid sikholwa ukuba ukubala ingwalo kuyaletha umehluko omkhulu empilweni yomuntu ikakhulu ebantwaneni abasakhula njalo sicebisa abazali ukuba bakwenze kube ngumlandu wabo ukubona ukuba abantwababo bayathola ingwalo zokubala kube yimpilo,” kuphethe uNkszn Faulkner.
Online Reporter