admin
YiNtatheli kaMthunywa
UKUPHENDUKA esikolo kwenye indoda yeKwekwe eleminyaka engu-38 yokuzalwa okubikwa yenza izifundo zikaFomu 3 sokubangele ukudideka phakathi kwabafundi, lababalisi kanye lezakhamizi.
Indoda le, uRemember Galela osefunda esikolo seThombankala Secondary khonangale eKwekwe kubikwa ufunda sikolo sinye labantwabakhe njalo kwesatshelwa ukuthi angabe eselobudlelwano obungalunganga labanye abafundi.
Abazali abaxoxisane loMthunywa basola abakhokheli besikolo ngokwamukela umfundi osekhulile bethi angaba lakho ukuxhwalisa abantwababo.
“Kulomfundi okhulileyo esikolo seThombankala njalo siyesaba ukuthi angacina esexhwalisa abantwabethu,” kutsho omunye umzali ongathandanga ukuqanjwa ngebizo.
Omunye njalo umzali okhulume loMthunywa uthe usezwe udletshana lokuba umfundi lo vele eseqalisile ukukhombisa abafundi kanye lababalisi.
“Umfundi lo ngizwa kuthiwa usekhombisa abanye abafundi kanye lababalisi.
“Lokhu kuzasixhwalisela abantwana. Sesike sabuza ababalisi ngalokhu kodwa bayaphika bemba phansi ukuthi uyakwenza lokhu lanxa kukhanya kukhona okunuka santungwana,” kutsho umzali lo, othande ukubizwa ngokuthi nguNcube nje kuphela.
UMthunywa uxhumane lomfundi lo, uRemember Galela ochaze ukuthi impilo inzima kungakho ufuna ukulungisisa impilo yakhe.
“Kunzima phandle lapha nxa ungafundanga yikho okungenze ngabona kungcono ukuthi ngibuyele esikolo ngoba bengiswele lapho engingacatshisa khona ikhanda. Umkami uyabe efuna isepa ngapha labantwana befuna ukudla yikho okwenze ukuthi ngikhethe ukuthi ngilungisise impilo yami lemuli ngokuqala ngibuyele esikolo,” kutsho uMnu Galela.
UMthunywa uxhumane lomphathisikolo wesikolo lesi oveze ukuthi bamukela uGalela esikolo ngoba ezakuba yisibonelo esihle kwabanye abafundi lasemphakathini.
“Umfundi lo uyisibonelo esihle ebantwini ngoba setshengisele ukuthi yiloba umuntu esemdala uyenelisa ukuwadla amabala aguqule impilo yakhe. Mina angazi lutho ngalokhu ukukhombisa okuthiwa uyakwenza, thina njengesikolo simbona engumfundi olungileyo njalo ozimiseleyo, ezifundweni zakhe,” kuphetha uMphathi lo.
Online Reporter