Online Reporter
Nkosilathi Sibanda
UMFUNDISI olodumo kwele-Africa, odabuka eNigeria u-Apostle Felix Okoh uzavakatshela kuleli ngoLwesihlanu elande ukuhlangana lamanye amakholwa kumbuthano ohlose ukuthandazela lokuletha insindiso kudolobho lakoBulawayo.
Umbuthano lo ngowe KEC (Kingdom Empowerment Centre) Grand Finale njalo uqhutshwa minyaka yonke.
Uzahlanganisa njalo labaculi bezokholo.
Abathandi labalandeli bomculo wokholo kuleli, lalabo abadinga insindiso sebenxuswe ukuthi baze ngobunengi kulumcimbi oqhutshwa minyaka yonke.
Kubikwa kuzakuba ncane indawo enkundleni kaHall 4 eZimbabwe International Exhibition Centre njalo kukhangelelwe ukuthi u-Apostle Felix Akoh atshumayele labanye abafundisi bakuleli abagoqela uBishop Dr Collin Nyathi, Mai Mwamuka, Michael Mahendere, Bishop Adam Rupere, Apostle Frank Magagula loProphetes Memory Matimbire.
Ekhuluma lephephandaba likazulu ngoMvulo emini, umkhokheli webandla leKEC uMphurofethi Bruce Edwards uthe:
“Lonyaka kugxilwe ekuvuseleleni ngokomoya idolobho lakoBulawayo labantu abahlala kulo. Lo ngumcimbi ozajabulisa abantu, abanye bathole insindiso. Sihlanganise lengcitshi kwezomculo wokholo. Sithi abantu abaze ngobunengi.
“Okubaluleke kakhulu yikuhlanganisa abaculi bakuleli, abafundisi lo-Apostle Felix Akoh endaweni eyodwa.
Sikhangelele ukuthi lonyaka kube ngumcimbi omkhulu kulayo yonke,” kutsho uMphurofethi Edwards.
Uthe bahlose ukubambanisa umphakathi ukuthandazela, kukhulekelwe ukuthi idolobho likhule kubelokuthula.
“Kuzakuba lusuku lwenjabulo, indumiso, ukukhonza, lensindiso.”
