admin
Ethel Ncube
ZIKHUZA imihlola izakhamizi zesidikidikini seFilabusi ngemva kokuba kukhithike owesifazane duzane lenkamba yamapholisa.
Indabamlonyeni le yenzakale ngempelaviki lapho inina leli, okubikwa likhithike livela phezulu ngemva kwemini ngehola lesine izulu lisina.
Kubikwa inina leli okungasatholakalanga igama lalo, lawela phezu kwentuba andubana lithi lifuqwe ngabanye balo phezulu bebanga unyawo lomntwana.
Intatheli ixhumane lesinye isakhamuzi, uMnumzana Busani Moyo owagijima wayabona ngesikhathi kuzwakala ukuba kulenina eliwe livela phezulu.
“Izulu lalisanda kuna ngezwa abantu besithi kulomuntu owele phambi kwenkamba yamapholisa lami ngagijima ngayabona ukuba kuhamba njani.
“Ngathola abantu belokhu bebuthene bembukele besthi uwe evela phezulu kuthiwa bamfuqile ngabanye bebanga unyawo lomntwana,” kubika uMnu Moyo
Omunye umfakazi okhulume lentatheli uveze ukuba lumuntu ubonakale izulu lisina.
“Le yimihlolo umuntu engawa evela phezulu emini kukhanya lombuzo uyasidida ukuthi kungabe kuhambe njani njalo kangizwanga echaza ukuba ngowangaphi simfice esethandele ilembu ephansi phambi kwegedi lamapholisa,” kubika umfakazi lo.
Ekhuluma lentatheli isikhulumi samapholisa eMatebeleland South uInspector Loveness Mangena ubike ukuba abakemukeli udaba lolu,
“Udaba olunjalo asikalutholi okwakhathesi,” kuphetha uIns Mangena
Online Reporter