admin
Thokozile Mbedzi
KUFE amadoda amabili kukanti oyedwa usesimeni esibi esibhedlela kulandela ukugwazwa kumbango wentombi esigabeni seCross Roads eSilobela.
Kubikwa umetheswacala uTalcott Mupasi oleminyaka engu-25 ugwaze wabulala ababili, uBlessed Sibanda oleminyaka engu-25 ohlala esiqintini seMadhambi lo Hillary Maphosa oleminyaka engu-21 ohlala esiqintini seSimangeta bonke bengaphansi kwenduna uMalisa mhlaka 29 Zibandlela.
Kuzwakale ukuba Talcott loSibanda babebanga intombi kungakho uMaphosa uthe ezama ukulamula ababili laba yabe isiwuchithile umuthi inkonyane ngoba uTalcott wahle wabambana lomnewabo uAgape Munashe Mupasi oleminyaka engu-21 bathelela uSibanda loMaphosa.
Isikhulumi samapholisa esabelweni seMidlands ulnspector Emmanuel Mahoko siqinisekise isehlakalo lesi esenzakala endaweni yamabhizimusi yeCross Roads lapho amadoda amabili ayizelamani acina ethelela ababili uMaphosa loSibanda.
Kuvele ukuthi uTalcott wakhipha ingqamu wagwaza uSibanda emhlane wawela phansi. Ngaleso sikhathi uMaphosa wazama ukulamula laba abasebesilwa kodwa laye wagwazwa. Kuthe uNqaba Ndlovu laye ezama ukulamula wagwazwa isifuba nguTalcott.
Kuzwakale ukuba ababili laba bebona ukuthi amadoda amathathu la ayesephansi acela ezinyaweni loba khathesi esesezandleni zamapholisa.
Amapholisa afika kule indawo esiyachwayisisa kukanti abathathu ababelimele bathwalelwa esibhedlela seKwekwe District Hospital lapho ababili uSibanda loMaphosa abafika batholakala ukuba sebedlule emhlabeni. Kukanti uNdlovu lokhu eselatshwa esibhedlela esifanayo.
Isikhulumi samapholisa siphethe ngokuxwayisa ukuthi uzulu kazame ukuxazulula ukungazwisisani ngokukhulumisana kulokulwa.
Online Reporter