Online Reporter
Ethel Ncube
KUZABE kujatshulelwa isiNtu samaAfrika eMzansi ngoMgqibelo esiwulandayo lapho okuzabe kuhlangene khona abahlabeleli beZimbabwe, South Africa, Botswana — yibo abazabe bejabulisa uzulu eBaseline Newtown Music Factory.
Abahlabeleli abazabe bekhona kuSouth Africa IsiNtu Fest 2024 kuzabe kuloMr Bones, Ingqungqulu Ezimnyama, PlatformOne, MfanakaJobe, Slizer, Sisasenkosi, Zinjaziyamluma, Gatsheni, Amavikelambuso, Thamsanqa, Teekay, Boss Golide, Pure Gold, Hwabaraty, DJ Mapressa Gearbox — yibo abazabe benandisa emcimbini lo.
Intatheli ixhumane loMapressa ongumqondisi womcimbi lo, obike okuba konke kuhamba kahle.
“Umcimbi lo ngowokuthakazelela isiNtu sakithi singabantu abaNsundu sigoqela amazwe athi Botswana, South Africa, Zimbabwe, Swaziland kanye leUnited Kingdom. Okwenzakala ngomcimbi lo, uyabhoda amazwe la, kuthakazelelwa isiNtu sakithi. Emcimbini lo abantu bayabe begqoke imvunulo yakithi etshengisa ukuba singobani, sivela ngaphi,” kubika uMapressa.
Uqhubekele phambili eveza ukuba abahlabeleli abandiswayo ngabavela kumazwe awe-Afrika.
“Lizananzelela ukuthi abahlabeleli abazabe bekholisisa uzulu ngabavela emazweni akithi, lokhu sizama ukuba sivuselele isiNtu sakithi ngabaculi bemazweni akithi.
“Siyamema uzulu oseMzansi ukuba asondele, abuye azozikholisela kumcimbi we IsiNtu Fest eBaseline. Thina lequla labahlabeleli sesilinde ilanga ukuba lifike sijabuleni ndawonye sithokozela isiNtu sethu ubuyithi bethu,” kuphetha uMapressa.
