admin
Ethel Ncube
INKOSI yesizwe samaXhosa ekhothame ngeviki ephelileyo kubikwa izabekwa ngeviki ezayo kukanti amaXhosa akuleli aqoqa isikhumbuzo salinkosi esisakwenzelwa kuleli ngoMgqibelo kuyonale iviki.
Lokhu kuza ngemva kokuba amaXhosa ehlelwe liyezi elimnyama kusedlula emhlabeni inkosi yawo uZwelonke Sigcawu ebileminyaka yokuzalwa engu-51 kulandela ukungaphatheki kuhle emzimbeni. Inkosi itshiye amakhosikazi amane kanye labantwana abangu-8.
Kusitatimende esikhitshwe yinkosana uXhanti Sigcawu ngoMgqibelo kubikwa inkosi yetshumi lambili yamaXhosa izabekwa eNqandu Great Palace, eWillowvale e-Eastern Cape okuyilapho inkosi eyazalelwa khona.
Okwamanje sokukhethwe uNkosi Dumehleli Mapasa ukuthi abambe isikhundla senkosi.
Inkosana uSigcawu ibike ukuba uMapasa oleminyaka eyedlula engu-80 yokuzalwa nguye ozakube ebambe isikhundla sobukhosi okwamanje kuthi ngemva komngcwabo kuqale umsebenzi wokubeka inkosi entsha.
Ikhuluma lentatheli induna yamaXhosa eMbembesi kuleli uDumisani Ndondo iveze ukudana okukhulu ngokulahlekelwa kwesizwe samaXhosa ithi inkosi ibingumuntu ozinikele ukusebenzela isizwe sakubo.
“NjengamaXhosa silahlekelwe kakhulu ngokwedlula emhlabeni kwenkosi uSigcawu. Inkosi ibiyindoda esebenza gadalala njalo esukumela phezulu nxa kusiza kundaba zesizwe kanye lamasiko esiXhosa.
“Ngiyakhumbula ngesikhathi ngigcotshwa inkosi ize ibuye isuka khonale e-Eastern Cape. Kwaba ngumcimbi omkhulu lo ngoba sivakatshelwe yinkosi okwenza sezwa siziqhenya ngokuba yisizwe samahosa.
“Thina njengamaXhosa silahlekelwe kakhulu, sikhala sindawonye kanye labaseMzansi Afrika,” kubika induna uNdondo.
Induna iphethe ngokubika ukuthi ngoMgqibelo amaXhosa akuleli azakwenza isikhumbuzo senkosi njalo abantu bazaziswa ngalesisikhumbuzo kanye layo yonke imininingwane ngohlelo lolu.
“Inkosi izangcwatshwa ngeviki ezayo ngempelaviki e-Eastern Cape lathi silungiselela ukuya khona ukuze sibekhona emngcwabeni. Kukanti ngoMgqibelo kuyonale iviki sikhangelele ukwenza isikhumbuzo seNkosi. Abantu sizabazisa ukuthi kuzahlanganyelwa ngaphi,” kuphetha induna uNdondo.
Intatheli ibuye yaxhumana njalo lesinye isakhamuzi seMbembesi uMnumzana Busani Tshuma oveze ukuba balahlekelwe impela.
“Sikhala sindawonye lomdeni wakoSigcawu kanye lesizwe sonke samaXhosa ngokutshiywa yinkosi yethu. Inkosi ibiyindoda ekhutheleyo njalo esebenza gadalala ukuba abantu baphumelele njalo babelentuthuko.
“Minengi imisebenzi uSigcawu ayenzela umphakathi kweleZimbabwe ubethi anganxuswa kumkhosi wamaXhosa ungadondi ukubuya, ubebuya njalo ehlala ekhuthaza umphakathi ukuba abantu kababambane. Sithi lala ngoxolo qhawe lethu, usebenzile,” kubika uMnu Tshuma.
Imizamo yokuxhumana lesikhulumi esibona ngamalungiselelo omngcwabo kweleMzansi Afrika yehlule ngoba ucingo lukhala lungadojwa.
Online Reporter