admin
Nkosilathi Sibanda
I-Hwange Local Board (HLB) isibambisane lenkampani yeSouth Mining Private Limited ekwakheni i-library ezakuba ngumthapho wolwazi osezingeni eliphezulu ngemali elinganiselwa ku-US$100 000.
Isakhiwo lesi siyingxenye yemizamo yokuthuthukisa amazinga emfundo kulindawo.
Umgcinisihlalo weHLB ukhansila Nqobile Ocean Mabhena ubikele iphephandaba likazulu ngoLwesibili ukuba ukwakhiwa kwe-library le kusehlelweni lwabo lokusebenzelana lamankampani kanye lenhlanganiso zamabhizimusi ezizimele zodwa.
“Singene kuhlelo zokusebenzisana leSouth Mining ukuze kwakhiwe umthapo wolwazi lo. Ngenxa yesimo somnotho welizwe, lekhansili yethu ibikhangelane lodubo lwemali okuphinde kwahlasela imisebenzi yethu yokuthuthukisa uzulu. Ngakho-ke kufanele sisebenzise ezinye izindlela ezifana lokusebenza ndawonye lamankampani afana leSouth Mining,” kutsho ukhansila uMabhena.
Uthe i-library le ayisoze ifane lamanye ngoba izakwakhiwa ifakwe imtshina yakulezi insuku ezakhuthaza abafundi lomphakathi ukuthi akhuthalele ukusebenzisa i-technology yamanje .
“Isakhiwo esikhuluma ngaso asisoze sifane lezinye esizijwayeleyo lapho okugcwele khona inqwaba yezingwalo.
“Umthapho wolwazi lo uzakuba le-technology yaphezulu eyakulezinsuku efana lama-computer leWI-FI, okuzakhuthaza abantu ukuthi benze okunengi. Ngaphezulu kwakho konke sikhangelele ukuthi i-library le izakhulisa ubudlelwano ebantwini ngoba izakuba yindawo yokuhlangana.”
Uqhubeke wathi ukwakhiwa kwe-library kuzaphathisa ekuthini abafundi bakhuthalele izingwalo.
Kulenkalakatha yenkinga kuzikolo ezisesigabeni seHwange eyokuthi loba abafundi bephumelela, bakhona abasuka bakhuthe ugatsha ngokwehluleka emihlolisweni.
UKhansila uMabhena uthe kungenye yenhloso yabo njengekhansili ukuthi bancedise kulokhu.
“Isigaba seHwange besilokhu silezinga eliphakeme kakhulu lokuphumelela kwabafundi kodwa kulesidingo sokuthi sithuthukiswe.”
Omele iSouth Mining uMnumzana Charles Muchabaiwa uthe ukwakhiwa kwe-library kuzagqitshwa ekupheleni komnyaka.
Ephendula imbuzo yephephandaba likazulu, uMnu Muchabaiwa uthe ukubambisana kwenkampani yakhe le-HLB kuluhlelo lokuncedisa umphakathi abasebenza kuwo, okubizwa ngokuthi yiCorporate Social Responsibility.
“Sizafaka imali engange-US $100 000 yokwakha i-library le. Imali le izasebenza njalo ekufakeni imtshina yakulezi insuku phakathi.
“Ukwakhiwa kwe-library kungeyinye yendlela ezinengi zokusiza umphakathini esisebenza kuwo,” kutsho uMuchabaiwa.
Online Reporter