Online Reporter
Nkosilathi Sibanda
OSAZIWAYO kumdlalo wenguqu eSouthern Africa sebebike ngokudabuka okukhulu ngokwedlula emhlabeni komdlali uTendai Ndoro.
UNdoro, obeleminyaka yokuzalwa engu-40, ubhubhele emzini wakhe eSouth Africa.
Kubikwa ubekhathazwa ngumkhuhlane wetshukela, okuyiwo owabangela ukuthi atshiye ukudlala ibhola ngesizini ka2020.
Wadlalela eBotswana ngo2009, ekuNico United.
Kuleli wazakhela udumo edlalela iChicken Inn leHighlanders, wasuka lapho wayakwenza izimanga ku-Orlando Pirates eSouth Africa. Ekhonale, waphinda waya kuCape Town City lakuBlack Aces.
Ngo2017, wahamba ku Al-Faisaly e-Arabia. Wake watshibilika kuHighlands Park le Al-Orouba e-Oman.
Kusenjalo, abazali bakamuyi sebekhulume ngobuhlungu abakubo, bebika ukuthi indodana yabo isidlule emhlabeni.
Unina kamuyi, uChristina Mukundwa unxuse bonke abantu ukuthi bathakazelele impilo yomntanakhe.
“Nginxusa bonke abadlala loTendai ukuthi babuye bezothakazelela impilo yakhe. Kunengi uTendai Ndoro asenzela khona njengemuli. UNkulunkulu uyazi, usemthethe,” kutsho uMukundwa.
Uyise, uSilas Mukundwa uthe: “UTendai ubengakhulumi lomuntu. Njengemuli sisalinde ukuzwa ukuthi kuyini okwenzakale kuTendai. Sisebuhlungwini. Sithanda ukubonga bonke abadlala laye.”
Abantu babuthene ku1916 eNketa 8 koBulawayo.
