admin
YiNtatheli kaMthunywa
“SINGABADLALI abangamela loba yiphi ithimu yenguqu kulumhlaba. Khathesi angeke uthi abadlali bomkhankaso weChan ngabafana abangela thalenta. Sitshiyene, kulabadlali bakuleli abaligiqa phetsheya. Lathi siyalazi ibhola ngokufanayo. Sizadlala ngokuzimisela okuphezulu . . .”
La ngamazwi kaEdmore “Spanela” Chirambadare omunye wabagadli abakhethwe kuqembu lamaWarriors elizancintisa kumqhugelwano weAfrican Nations Championship (iChan).
Umgadli lo okwamanje usenkambeni yokulolonga labanye abadlali ngaphansi komqeqetshi uCallisto Pasuwa.
Umdlali lo usebike ukuba kuzatsheka ibhetshu kwamanye amazwe, ikakhulu la abazadlala lawo kuqula lika-D abalisa iZambia, iMali leUganda.
Umqhugelwano weChan uqala mhlaka 16 kuZibandlela usiyaphela mhlaka 7 kuNhlolanja. IZimbabwe idlala mhlaka 18 lesizwe seZambia enkundleni yeRubavu.
“Imidlalo yethu leZambia, iUganda leMali izatshengisa ababukeli bomdlalo ukuthi silethalenta lapha eZimbabwe.
“Umdlalo wethu awufani lowamanye amazwe. Ngiyaqala ukudlala kulumncintiswano kodwa sengikhululelike ngoba lapha ngaphansi kukaPasuwa ngifike ngemukelwa kuhle,” kutsho uChirambadare.
Kusenjalo, umaneja wamaWarriors uSharrif Mussa ubika ukuba abakasuthiseki ngesimo samahotela lenkundla abazadlalela kuzo.
UMthunywa utshayele uMussa ucingo kwavela ukuthi inhlanganiso yeZimbabwe Football Association isihlasele abaqoqi beChan eRwanda ukuthi balungisise isikhalazo lesi.
“Asifuni ukuthi siphiwe ihotela ezakwenza isimo sibenzima kubadlali bethu. Kuyaziwa ukuthi kuba lokwabiwa kwenkundla lendawo zokuhlala ezehlukeneyo lalokho okuphiwa amanye amazwe.”
UMussa ukhuthaze ukuthi abadlali balolonge ngokupheleleyo bengabi lendaba lokunengi.
“Ngokudlala kakuhle abakwenzileyo size sifike lesi isigaba, abadlali akumelanga bahlutshwe yilutho. Sikhuluma ngomncintiswano wamazwe lapha. Sifuna ukuhlohla amabhola amanengi, sinqobe lemidlalo eminengi, kulalokho esakwenza ngo2014 eCape Town.”
Umaneja lo uthe ubonga kakhulu umqeqetshi uPasuwa okunguye okhuthaza njalonje abadlali ukuthi bazimisele.
Online Reporter