‘Lenze iphutha iqembu leBigNuz’

Mthokozisi Dube
UMCULI wakuleli uCentre Party useveze ukukhathazeka ngesenzo seqembu labaculi bakwele South Africa iBigNuz owabambisa abalandeli bakhe ilitshe ngokungabuyi ukuzobathokozisa.
Iqembu leli lilamalunga athi Masheshe, Danger and Mampitsha.

UCentre Party ubike ukuthi kungenani ngokwakusenzakala kulelo, abahlabeleli laba, iBignuz, kwakumele bagcwalise isithembiso njalo bahle basebenzise lelothuba ukuxolisela abantu bakibo.

“IBignuz yaphambanisa, ibingeke yenziwe lutho njalo kwakumele isebenzise ithuba lomkhosi lo ukuxolisa bemele inzalo yakweleSouth Africa,” kubika uCentre Party.

UCentre Party ubike ukuba izizalwane zakuleli zithanda ukuthula kungakho zazingeke ngitsho zihlasele umhlabeleli lo.

“Ngabe kuyenzeka besingaqoqa umkhosi wokumanyanisa abantu bakweleSouth Africa labakwamanye amazwe alahlekelwe ngabantu bawo ngoba sonke singama Africa,” kuchaza uCentre Party.

UCentre Party usole uHulumende wakweleSouth Africa ngokuphuza ukuthatha amanyathelo nge-xenophobia.

UCentre Party uqhubekele phambili ebika ukuba sonke singabantu abamnyama yikho nje kumele silandele okwenziwa ngabahlabeleli abafana loBob Marley bona abamanyanisa abantu ngomculo wabo.

“Akula sivakatshi eAfrika, imingcele le esikhona yadalwa ngamakhiwa wona ayesabelana amazwe kodwa thina singabantu banye ngoba ungakhangela  usendo lwakho luyahlangana lolomunye umuntu ophandle kwaleli lizwe,” kubika uCentre Party.

UCentre Party ubike ukuba usekhiphe ingoma ethi “We are all Blacks” eyingoma esola i-xenophobia ngoba abantu beAfrica bengabantu banye.