admin
YiNtatheli kaMthunywa
LIKHUTHE ugatsha isela lelokitshini lePumula koBulawayo nanko phela lithe lizama ukubaleka ngemva kokutshontsha omakhalekhukhwini layadibha phakathi kwechibi lengcekeza.
Isiga lesi senzakale kuviki ephelileyo ngoLwesithathu ngesikhathi kugijinyiswa amasela amathathu loba kucine kubanjwe eliwele echibini lengcekeza layavalelwa enkambeni yamapholisa yeMagwegwe.
Esinye isakhamuzi sePumula ebesigijimisa amasela la, esikhulume loMthunywa uMnumzana Danny Dube uveze ukuthi amasela la abemathathu.
“Abafana laba bahluthunele esinye isakhamuzi umakhalekhukhwini qede bacela ezinyaweni. Izakhamizi zibahlala izithende. Ababili babaleka kwathi oyedwa wasuka ePumula waze wayabanjelwa eMagwegwe. Ngesikhathi ebaleka yikho lapho adlule khona edibha phakathi kwamachibi engcekeza,” kutsho uMnu Dube.
Iphephandaba likazulu liphinde lakhulumisana loMnumzana Zamani Ndlovu obonge ukubambana kwezakhamizi.
“Abantu basukumele phezulu kugijinyiswa lelisela, njalo labomakhalekhukhwini ababatshontshileyo babonakele,” kutsho uMnu Ndlovu.
Imizamo yokukhulumisana lesikhulumi samapholisa akoBulawayo yehlule.
Online Reporter