admin
Ethel Ncube
KULESELA ebeselihluphile ngokuhlasela abantu lihlomile ebelidingwa ngamapholisa elihlangane lembila zithutha koBulawayo nanko phela lidutshulwe intamo selizama ukubaleka enkambeni yamapholisa.
Umetheswacala uVincent Mpofu oleminyaka engu-29 yokuzalwa udutshulwe ngamapholisa ngeviki ephelileyo kulandela ukubotshwa koBulawayo.
Kuzwakale ukuba uMpofu ungomunye wamasela acatshangelwa ukuba ngenyanga kaMpandula bahlasela izithandani emgwaqweni osuka koBulawayo usiya eHarare bazithathela imali engange US$32 000 andubana baye endaweni yamabhizimusi yeSilozwe eMatopo batshontshele abantu abambalwa mhlaka 21 Lwezi.
Amapholisa abevele edinga uMpofu ngamacala njalo okungayi emthethwandaba ngamalanga abizwe ngawo.
Amapholisa elizweni kukhasi leTwitter aveze ukuba umetheswacala uhlobene lamanye amacala okutshontsha ehlomile angu-14 emgwaqweni osuka koBulawayo usiya eHarare.
Isikhulumi samapholisa elizweni uAssistant Commissioner Paul Nyathi uthe uMpofu ubanjwe ngemva kokubotshwa komunye ayelaye ngesikhathi behlasela abantu eMatopo.
Uthe amapholisa ezwa udletshana lokuba omunye walabo abahlasela eSilozwe, eMatopo uLidion Moyo uhlala ngaphi okwenza bayamchathamela wabotshwa.
Ukuchwayisisa kwamapholisa kwenza uMoyo waveza abanye asebenza labo uMpofu loLiberty Moyo labanye andubana athole ukuthi uMpofu utholakala ngaphi wahle wayabotshwa.
Kuzwakale ukuthi ngesikhathi uVincent ebotshwa ubelombhobho olenhlamvu kuwadilobhu.
UMpofu kubikwa ulalisiwe esibhedlela lapho alindwe khona ngamapholisa
Online Reporter