admin
Thokozile Mbedzi
KULENDODA efe ngemva kokugalula eNswazi eSigodini ngempelaviki.
UMsizi Ncube obeleminyaka yokuzalwa engu-20 ubethiya inhlanzi edamu leMziki wasebikela abangane bakhe ukuthi uyatshiselwa kungakho usefuna ukungena emanzini abhukutshe.
Kubikwa wahle weqela emanzini nje abanye bakhe bathe mhlawumbe konke kulungile kukanti ababuzanga elangeni.
UNkosazana Elizabeth Msizi oyisihlobo sikamuyi uthe bathithibele njengemuli ngesehlakalo esibehleleyo.
“Lokhe sididekile njalo sithithibele ngalokhu okusehleleyo njengomdeni. UMsizi ubethiya inhlanzi labanye bakhe ngoMgqibelo wasesithi yena uyatshiselwa ufuna ukubhukutsha.
Abangane bakhe bathi uhle weqela emanzini abanye bakhe besacabanga ukuthi uyantsheza kanti umuntu usegalule.
“Abangane bakhe bathe benanzelela ukuthi omunye wabo kasantshezi bazama ukumdinga abazange bathole lutho yikho ukuthi bagijime bayebikela abadala kanye lamapholisa,” kulandisa uNkszn Msizi.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uvumile ukuthi kulendoda egalule edamu ngempelaviki.
“Udaba lwendoda egalule ibhukutsha solufikile ehofisini yethu.
Abangane bakamuyi bagijime bayabikela amapholisa wona ahle aphuthuma ayakhona enelisa ukukhipha isidumbu sikamuyi emanzini.
“Njengamapholisa sithanda ukukhuthaza uzulu ukuthi angadlaleli emanzini ikakhulu nxa engazi ukuntsheza,” kuphetha uInsp Mangena.
Online Reporter