admin
Ethel Ncube
ABALIMI bakhuthazwa ukuba balime ubunyunya (sesame seeds) ngoba buyavuma endaweni ezitshiyeneyo zelizwe.
Ubunyunya zintanga ezincane ezivuvuzelwa phezulu kwesinkwa kumbe amabhanzi.
Umlimisi weAgritex esabelweni seMatabeleland North uMnumzana James Ndlovu uveze ukuba abalimi kabazame ukulima ubunyunya ngoba kabukhethi umhlabathi.
Ekhuluma loMthunywa uMnu Ndlovu uthe abalimi kabangesabeli khatshana ukubulima ngoba buyamelana lokuswelakala kwezulu njalo bulemali.
“Ubunyunya elizweni bulinywa ngabantu abalutshwana kakhulu kungakho sikhuthaza abalimi ukuba babulime.
Isilimo lesi asifuni manzi amanengi njalo siyavuma endaweni ezomileyo futhi kasikhethi lomhlabathi,” kubika uMnu Ndlovu.
Uqhubekele phambili waveza ukuba ubunyunya abufuni zulu elinengi.
“Izulu nxa lingaba linengi kuyehlisa isivuno sakho. Ubunyunya buthatha amalanga angu-120 kuphela ukuthi sivuthwe njalo sivunwe. Umkambo waso mkhulu ngoba banengi abantu ababhakayo kanye labakufaka ekudleni kwabo,” kuphetha uMnu Ndlovu.
Online Reporter