admin
Nkosilathi Sibanda
UMQEQETSHI weHighlanders uMandla “Lulu” Mpofu engabe esezithele phakathi kwenkinga engaba nzima ukuthi ayixazulule kulandela ukunqontshwa kweqembu lakhe kumidlalo edluleyo.
Engakhitshwa emsebenzini uma engehluleka ukuthola imiklomelo kumidlalo elandelayo, uMthunywa ukuzwile lokhu.
Udletshana oluvela emawofisini aleliqembu, aku-50 Robert Mugabe Way, luveza ukuba kuleqhinga eselibotshwe zinkokheli ukuba uMpofu ehliswe isikhundla kuqhatshwe uThulani “Thuts” Sibanda.
USibanda ubekuBulawayo Chiefs, andubana alifulathele leliqembu kulisizini.
Kumaviki ambalwa asanda kwedlula, uSibanda ubonakale etshitsha tshitsha emawofisini eHighlanders, okuyikhona okukhweze ihungahunga lokuthi zikhona ingxoxo thile ngokuthi kumele azoncedisa kwekaMatshobana.
Osabambe isikhundla sikamaqhuzu weHighlanders uRonald Moyo kazange enelise ukuchaza ngaloludaba.
Kodwa ke, umfakazi oqotho oncwebe uMthunywa indlebe uthe “abadala bakhathazekile ngoMpofu.
“Usebunzimeni uMandla nxa engehluleka ukuthi iqembu linqobe kumidlalo ezayo. Engaxotshwa kungene uThulani Sibanda,” kutsho umfakazi othembekileyo, ocele ukuthi engaqanjwa ngebizo.
“Le yindaba esegudwini. Isakhulunywa ngabadala.”
IHighlanders yakhitshwa kumqhudelwano weChibuku Super kubanga lama-quarter final, okwayangisa kakhulukazi, nanko yiyo ebiyintshantshu yalinkezo ngo-2019. Kube yisililo njalo abafana bakaMandla bedliwa 2-0 yiBlack Rhinos kumdlalo wokuvula iligi yeCastle ngoMgqibelo.
Online Reporter