admin
UMKHOKHELI womdlalo we-basketball kuleli uJoe Mujuru ubika ukuthi uzizwa ekhathazeka ngabaqeqetshi babo abaswela ulwazi olujulileyo kulumdlalo.
UJoe Mujuru uthe banengi abaqeqetshi abalokhe befundisa abadlali okungayisikho, okudala ukuthi amaqembu adlale ngesisindo esiphansi.
Ukhulume lokhu ekhuthaza ababalisi labaqeqetshi bamathimu izifundo ezintsha kulumdlalo, esithi kubalulekile ukuba abaqeqetshi bethathele phezulu izifundo ze-Federation of International Basketball Association (Fiba). Izifundo lezi zike zaqhutshwa kuleli, anduba imidlalo ivalwe yi-Covid-19.
Inhlanganiso yeBasketball Union of Zimbabwe (BUZ) yake yaqhuba ezifundo ezaphakamisa abaqeqetshi lababalisi ngomnyaka ka-2018, ngesikhathi inxuse isazi kweze-basketball uManuel Samuel Carballo.
Ekhuluma lentatheli kuliviki uMujuru uthe akubuzwa umuntu ukuthi izifundo zibaluleke kangakanani emdlalweni.
“Okungithabisayo yikuthi ngesikhathi lesi, abaqeqetshi bethu, ikakhulu sebezathi ukuthola njalo ulwazi, kulandela ukuvalwa kwemidlalo okwadalwa yi-Covid 19. Izifundo kubaqeqetshi ziqakathekile ngoba ziyengeza ulwazi.
Besikhathazekile ngenani labaqeqetshi labadlali abangela lwazi lokuqhuba imidlalo. Abaqeqetshi bebelolwazi oluncinyane kodwa khathesi sebezakwazi ngcono nge-basketball.
“Lesi yisiqalo kumdlalo wethu njalo kuhambelana lenhloso yethu yokufuna ukukhulisa ulwazi ngalumdlalo kundawo zonke zelizwe. Sikhangelele ukuthi izabelo zonke zithumele abaqeqetshi,” kutsho inkokheli le.
Kusenjalo abaphethe umdlalo lo esabelweni seMatabeleland North babika ukuba baphezulu kokulungiselela imidlalo yobungane yokuthakazelela ikhefu lokubambana.
Umongameli we-basketball eMat North uPendrick Ndlovu ubike ukuba inhloso yabo yikuthi basebenzise umdlalo we-basketball ukuthuthukisa intsha.
Online Reporter