Online Reporter
Amos Mpofu
AMAPHOLISA eZimbabwe Republic Police (ZRP) asexwayise uzulu, ikakhulu abatshayela imitshova lezimota (imishikashika) ezingelamvumo, ukuthi bekele ukuhlasela, ukumelana loba ukuphazamisa amapholisa nxa esenza umsebenzi wawo ngokusemthethweni.
Amapholisa athe lokhu kulicala njalo loba ngubani otholakala elecala elinjalo uzabotshwa ayemiswa emthethwandaba.
Isixwayiso lesi silandela ukusabalala kwevidiyo enkundleni zokuxhumana etshengisa umtshayeli wemota ehlasela ipholisa eMutare.
Kumbiko wamapholisa umsolwa okuvidiyo le, usebotshiwe.
“Sikhangele kuvidiyo esisabalala ezinkundleni zokuxhumana etshengisa ipholisa lihlaselwa ngumtshayeli wemota kwenye indawo yokuthengisa uphethulo, iZRP ibika ukuthi uBrendon Tsakatsa (29), ohlala kuNumber 1285
Chikanga 1, eMutare, usebotshiwe ngecala lokuhlasela uConstable Maxwell Mukumbuzi mhlaka 29 Nhlangula 2026.”
Amapholisa aphinde agcizelela ukuthi awasoze avumele ukuhlukuluzwa kwamalunga awo kungakhathalekile isizatho.
“I-ZRP ixwayisa labo abathwala abantu ngezimota lemitshova okungekho emthethweni ukuthi bekele ukuphambanisa amapholisa ekuqhubeni umsebenzi wawo. Ukwenza lokhu kulicala, njalo abephula umthetho bazabotshwa basiwe emthethwandaba kungelakukhetha,” kutsho amapholisa.
I-ZRP iphinde yanxusa uzulu ukuthi asebenzisane lamapholisa nxa esenza umsebenzi wawo. Nxa kulokusola loba ukukhonona ngendlela amapholisa asebenza ngayo, uzulu ukhuthazwa ukulandela indlela ezisemthethweni zokufaka izikhalazo kulokuthatha umthetho bawufake ezandleni zabo.
