admin
Cornelius Luphahla
IQEMBU lomculo wezesiNtu elidabuka koBulawayo i-Ezimnyama Arts lithembisa ukuphekela uzulu idlalade elimnandi okwamagama kugoqela iCD kanye leDVD yakhona.
Leliqembu lithi seliqalile ukulipheka lelidlalade ngenhloso yokujabulisa uzulu ngomculo walo kanye lokuvuselela amasiko alapha koMthwakazi njengoba nje litshaya kakhulu ingoma lemigido yesiNtu.
UMthunywa ukhulumisane loMqondisi waleliqembu uFibion Ncube wathi iqembu labo selilesikhathi eside balisungula yikho nje sebebona kungcono ukuba bapheke idlalade.
“Thina njengeqembu lokujabulisa uzulu sesileminyaka eyisikhombisa saqala umsebenzi lo. Yikho-ke okudale ukuthi sipheke idlalade ngoba abantu bayawujabulela umculo wethu kodwa kabawutholi, bawuzwa nxa sithe saba le-show.
Ngakho ukukhipha idlalade lokhu kuzadala ukuthi umculo wethu utholakale lula lathi sithuthuke.
“Sinanzelele ukuthi amasiko akithi ayatshabalala njalo inengi lentsha kaliwathandi selithatheke ngamasiko ezinye izizwe. Ngalokhu thina njengentsha sifuna ukuveza kudlalade lethu ukuthi siyenelisa ukujabulisa abantu ngomculo wesiNtu,” kutsho uFibion Ncube.
UNcube uqhubekele phambili wachaza ukuthi bazakhipha iCD kanye leDVD ngensuku ezifanayo.
“Abantu kabahlale belindile ngoba sizaqala ngokukhipha iCD silandele ngeDVD kodwa konke lokhu sizakwenza amalanga elandelana kuzonezi inyanga ezizayo. Senza lokhu ukuze abantu bazibonele umsebenzi wethu njalo sizafaka leminye imigido yakkathesi efana lepansula,” kutsho uNcube.
UPatience Mayere onguAdministrator waleliqembu ubikele intatheli ukuba iqembu leli lizathuthukisa amasiko akoMthwakazi.
“Ngokukhipha idlalade leli esiliphekayo ngilethemba lokuthi amasiko akuleli azavuseleleka ngoba yonke imigido yakoMthwakazi izabe ikhona kilo. Labangayaziyo imigido le bazayifundela kulelidlalade.
“Lokhu kuyasijabulisa kakhulu ngoba kusivezela ukuthi siyathuthuka njengeqembu lokujabulisa abantu ngoba sizaveza imbali yakoMthwakazi ngedlalade lethu esiliphekayo,” kuphetha uMayere.
Online Reporter