admin
YiNtatheli kaMthunywa
USEKHOMBA ngophakathi owayeqeqetsha amaWarriors uTom Saintfiet nanko usengenise ilizwe laseGambia kuma-quarter final omqhudelwano we-Africa Cup of Nations.
IGambia, echinsa ukudlala ku-Afcon yehlule iGuinea nge-1-0 eStade Omnisports de Bafoussam ngoMvulo ebusuku, ukuze ingene kulesisigaba.
Ifinyelele kulesi isigaba ngokudla iMauritania leTunisia nge-1-0, yadlala ngokulingana nge 1-1 leMali.
Ngaphandle kokuqeqetsha iZimbabwe, uSaintfiet wakhokhela amazwe abalisa iTogo, Bangladesh, Trinidad leTobago, iMalta, ngaphambi kokuthi aqhatshwe yiGambia ngo-2018.
Uke waqeqetsha amaqembu eBelgium, Qatar, Germany, Faroe Islands, Finland, Jordan, Netherlands, Tanzania, Namibia, Ethiopia leMalawi.
Ubike ukuba lokhe waqeqetshayo, akakaze athole okufana laseGambia.
“Sengihambe izindawo ezinengi njalo ngabona okunengi kodwa akukho okufana lalokhu esikwenza ku-Afcon le leqembu leGambia. Ngijabulile kakhulu njalo ngiyaziqhenya ngabadlali bami,” kutsho uSaintfiet.
“Ngehle ngenyuka e-Europe ngezindleko zami ngiyocela abadlali abalobuzwe obubili ukuthi bamele iGambia.
Bengikwenza lokho ngoba bengiyazi inhloso yami futhi angikaze ngibe ngumuntu obeka imali phambili.”
Inengi labadlali abaseqenjini leScorpions badlala e-Europe kumaligi ase-Italy, Spain lamanye, ikanti u-Ebrima Sohna nguye kuphela odlala kuligi yeGambia kuFortune FC.
Unozinti uModou Jobe, odlalela iBlack Leopards kuGladAfrica Championship, laye uyingxenye yaleliqembu.
USaintfiet uthe abadlali wabakhetha ngoba betshengisa ukuthi bahambisana lenhlelo zakhe njalo bezimisele ngokumela iGambia.
IGambia isamelwe ngeyinye impi enzima njengoba isazodlala leCameroon kuma-quarter final ngoMgqibelo.
Online Reporter