adminNguEmmanuel Ndlovu
UKUKHULA komncintiswano kwezokuzithokozisa sokudale ukuthi abanye abadlali banyamalale kukanti abanye sokubenze baphuma lamaqhinga amatsha okubopha ziqine.
Lokhu yikho osokwenziwe liqembu le-Explosion elamajaha adume ngezokugida umgido we-hip hop.
UEugene Ndlovu ongumqondisi waleliqembu uthe ukuze bamelane lomncintiswano okhona sebebone kungcono ukuthi labo bangene kundima yokuhlabela.
Uthe lumbono wokungena kwezokuhlabela babelawo kodwa babesalokwesaba ukuthi hlezi bengaphumeleli kusifiso sabo.
“Sesizimisele ukungena kwezokuhlabela lathi iloba abantu besazi siliqembu eligxile kwezokugida kuphela.
“Inhloso yethu ngeyokuhwatsha indlikizane yamadlalade amabili aphekwe ngohlonzi olukhulu ngoba ama-videos engoma ze-hip hop kufanele akhange abalandeli.
“Okunye okwenza sibelomfutho wokupheka izingoma yikuthi sinanzelele ukuthi lapha koNtuthu balutshwane abahlabeleli abaziwa ngokupheka ama-videos ohlobo lomculo we-hip hop,” kutsho uNdlovu.
Amadlalade amabili alokhe esasembizeni kubikwa ngathi Queen of my heart lethi Something about you gal.
Lamadlalade kubikwa khathesi adlodloma ese-moonlight studios khonalapha koBulawayo njalo akhangelele ukuphakululelwa umphakathi ekupheleni kwayonale inyanga.
UNdlovu ubuye wathi bakhangelele ukuhambisa amadlalade la kumabonakude we-Ztv
Iqembu le-Explosion lasungulwa ngomnyaka ka2009 njalo lilamalunga agoqela uAlex, Oscar, Kenmore kanye loNdlovu.
Online Reporter