admin
Cornelius Luphahla
KULIVIKI zikhona njalo ezinambithekayo kwezokuthokozisa uzulu nanku phela iphephandaba likazulu liphethe iqembu elilodumo kwezomculo wezokholo eliphethe ingilosi zodwa uqobo. Leliqembu liholwa litshatshazi lentombi edabuka eLupane, kayiculi nje lintombi ithela amanzi.
Kambe kungaba yiliphi iqembu elicula kangaka ngaphandle kwe-Izwi Lesiphelo Gospel eliholwa ngu Caroline Ncube.
Othanda ukuzijabulisa ngezokholo, kule iviki nansi ingxoxo emnandi phakathi kuka Caroline Ncube (CN) lentatheli yephephandaba likazulu uCornelius Luphahla (CL) bekhuluma ngaleliqembu.
CL: Umphakathi uthanda ukwazi mayelana lembali yakho kanye leyeqembu lenu Izwi Lesiphelo?
CN: Mina ngazalelwa esibhedlela seSt Luke’s eLupane ngakhulela esigabeni seShashi eLupane. Ekukhuleni kwami ngangithanda ukuhlabela ikakhulu esikolo kanye lesontweni yeTwelve Apostolic Church of Christ lapho engikhonza khona.
Ngasuka ngayakweleSouth Africa lapho engafika khona ngahlangana labangane bami engicula labo sasesisungula iqembu lethu ngo2012.
CL: Akutsho ntombenhle ukuthi licula libangaki eqenjini lenu lokhe laqala ukucula?
CN: Thina njengeqembu saqala sicula singu 7 kodwa ngenxa yomsebenzi abanye batshiya. Khathesi sesicula sibahlanu, sigoqela uXoliswa Thebe, Thalitha Ncube, Thembi Nkomo, Gabriel Ndlovu loPromise Mhlanga. Omunye osincedisa kakhulu ekuphekeni amadlalade ethu nguMxolisi Ncube onguye uProducer wethu. Kodwa noma sibalutshwane sipheka ingoma ezimnandi kakhulu ngoba sifuna uzulu akholise.
CL: Selakhipha amadlalade amangaki ntombenhle lokhe lasungula iqembu lenu?
CN: Lokhe saqala ukucula sesakhipha amadlalade amahlanu, elakuqala salikhipha ngo2012 elithi, Ngale Kwelanga, salandela ngelika2013 elithi Ngenza Intando kababa, kweza elika2015 elithi Ngiyeza Nkosi Yami, sacina ngelika2016 elithi Baba Siyabonga.
CL: Njengeqembu lezokholo landise ukutshayela ngaphi ingoma zenu lokhe laqala ukucula?
CN: Ingoma zethu sandise ukuzitshayela endaweni ezehlukeneyo ezigoqela kuma-shows, kuma-festivals atshiyeneyo, kanye lasemikhulekweni eyenziwa ngamabandla atshiyeneyo ezokholo. Esikhathini esinengi ingoma zethu sizitshayela kwelakithi koMthwakazi noma nje sisebenza kweleSouth Africa ngenhloso yokuvezela abakithi ukuthi labo bengenelisa ukucula njengathi.
CL: Abantu bathini ntombendala ngomculo wenu njalo likhangelele ukubenzelani lonyaka?
CN: Abantu bayawujabulela kakhulu umculo wethu njalo basikhuthaza ukuthi siqhubekele phambili sicula ngoba siyabajabulisa. Okunye njalo bayasimema endaweni ezehlukeneyo ukuba sizobatshayela ingoma zethu.
Ngalokhu lonyaka sikhangelele ukuvakatshela indawo ezehlukeneyo sisenza ama-shows ukuze abangasaziyo babesazi. Sikhangelele njalo ukuvakatshela kwelakithi koMthwakazi siyebatshayela idlalade lethu esisanda kulikhipha ukuze babone ukuthi lathi siyabakhumbula.
CL: Lokhe laqala ukucula selahlangana lenhlupho bani kwezomculo njengeqembu?
CN: Ubunzima esiyake sihlangane labo yikuthi sikhathazwa ngabantu abantshontsha umculo wethu bawuthengise ngentengo ephansi njalo ngaphandle kwemvumo yethu. Lokhu kusuka kusehlisele izinga lomculo wethu noma nje sisebenza nzima ukuthi siwuphakamise.
CL: Nkuthazo bani oyipha abaculi abasacathula njengoba selilesikhatshana laqala ukucula?
CN: Kubaculi abasasungula ngithi kababambelele bengaze baphela amandla ngoba vele kunzima ekuculeni. Okunye ngikhuthaza ukuthi basebenzise iziphiwo zabo bengaze baculela ukuthola udumo kuphela.
Online Reporter