admin
Cornelius Luphahla
KUZABE kungabizwa ozwayo emkhosini wokuthakazelela isikhumbuzo senkosi uMzilikazi lapho amaqembu omculo kamaskandi azadibana khona kuthunqe uthuli lothudlana.
Umkhosi lo uzakuba khona mhlaka 10 Mpandula lapho amaqembu kamaskandi agoqela Abafana bakaGodlwayo, Insukamini, Amabhukudwana, uZinjaziyamluma kanye lamanye njalo amaqembu kamaskandi atshiyeneyo.
UMthunywa ukhulumisane loThabani Dibi umholi weqembu laBafana bakaGodlwayo wachaza ukuthi umkhosi lo umkhulu kakhulu njalo yikho okudabuka khona umculo kamaskandi.
“Umkhosi lo umkhulu kakhulu njalo yikho okudabuka khona umculo kamaskandi ngoba ngowezamasiko.
Ngalokhu-ke ngikhuthaza uzulu ukuthi abuye ngobunengi bakhe azokholisa mahala ngoba yikho esizabe sitshaya khona idlalade lethu elitsha kanye lamanye njalo amadlalade ethu njengeqembu.
“Okunye njalo umculo wethu njengamaqembu uzabe utholakala kanye lezinye impahla zamaqembu kamaskandi,” kutsho uThabani Dibi.
Ekhuluma loMthunywa uChristopher Ncube omunye wabaholi beqembu leNsukamini uveze ukuthi ngalelilanga bazabe becula ngendlela elohlonzi kakhulu kakhulu.
“Lonyaka siza lolukhulu ngoba siphethe amajaha angena kucitshe ilanga kuvunguze ngitsho lomoya. Lapha sizabe sitshaya unyawo oludala lolutsha olugoqela indlama, ingquzu, kanye lemihlobo yonke yesitshikitsha
“Ngalokhu-ke abantu kabalungiselele ukudla inyama kanye lokubona ukudla kwamehlo ngoba sizabe sibaphakela khona uqobo,” kutsho uChristopher Ncube.
UJunior Ngwenya umholi weqembu leMabhukudwana ubikele uMthunywa ukuthi emkhosini lo kuzabe kutholakala iDVD abalikhiphe lonyaka.
“Uzulu kalindele indaba ezimnandi ngoba ngalolusuku kuzaqamuka imbatata endodeni kuhele kozeleyo. Amaxhegu asemxhiliba azakhumbula ngensuku esakhula kutsheke ibhetshu endodeni. Lapha yikho okuzabe kutholakala khona njalo iDVD lethu esilikhiphe lonyaka kuthi labo abangasaziyo bazasibona mathupha.
“Okunye njalo sikhangelele ukuthatha ingxenye yeDVD lethu esizalikhipha kumnyaka ozayo ngakho abafuna ukuphuma kuleliDVD kababuye ukuze babekhona kilo,” kuphetha uJunior Ngwenya.
Online Reporter