Online Reporter
YiNtatheli kaMthunywa
Sesisondele isikhathi sokulima amaluba nanko phela enza kuhle ngesikhathi sezulu ngakho-ke abalimi bakhuthazwa ukuba balungiselele ukuwalima.
Intatheli kaMthunywa ikhulumisane lomunye wabalimi njalo ekubhizimusi yamaluba uMnumzana Evans Sibanda obike ukuthi abantu abanengi amaluba abawaboni eqakathekile njengezinye izilimo ezidliwayo.
“Abalimi abanengi abawaqakathekisi amaluba ngoba becabanga ukuthi kawadliwa njalo awalabhizimusi,” kuchaza uMnu Sibanda.
Uqhubekele phambili esithi amaluba adinga amanzi amanengi ngakho isikhathi sezulu yiso isikhathi esiqondileyo sokulima amaluba.
“Isikhathi sezulu ngiyasijabulela ngoba amaluba adinga amanzi amanengi ngakho sengihle ngaqala ukulungisa isivande sami,” kutsho uMnu Sibanda.
Ubuye wachaza ukuthi waqala ukulima amaluba kudala ewalima egumeni lakhe eNjube ngakho abantu babebuya ukuzowathenga endlini.
Uchaze njalo ukuthi amaluba abemenzela impilo ibengcono kwezemali njalo ubike ukuthi wandise ukulima kakhulu imihlobo yama-rose egoqela i-Interlant le De-ruiter.
“Mina ngiyakuthakezelela ukulima amaluba ikakhulu imihlobo le yama-rose iinterlant le De-ruiter, ngawayenzela indawo enhle yokuwalima egumeni lami njalo abantu bayawalanda khonapha engihlala khona,” kuphetha uMnu Sibanda.
