Online Reporter
Sikumbuzo Dabengwa
Izifundo ezitholakala kugwalo
Ugwalo lukaMnumzana Khiyaza luhlasimulisa umzimba ngezifundo ezinengi ebadaleni lakuntsha yonke, kubomama labobaba jikelele. Zikhona kuzisebenzi kanye lasezinkosini singabali lesikuthola kwasebethule asebeyizithutha. Asikhangeleni izifundo
lezo :-
Kugwalo sifunda ukuba ukuthumba umuntu ongamaziyo, kubi ngoba angakujikela njengebhubesi obulondla, ekugcineni likudle uphila. USinyoro lomnkakhe babefuna isisebenzi samahala baquma ukuyadinga kwelaMasakade becabanga ukuba lesosigqili sizahlala singazi kibo.
Siyafundiswa njalo ukuba ukuthanda ukulondoloza amafa ngokungakhokhi lutho kudala insumansumane yendaba usugqilaze ongagqilazwayo. USinyoro lomnkakhe bafuna ukugcinelwa amafa abo bacina bewafela ngokuthunjwa kwabo nguSukuzukuduma esekhulile esetshelwa ayekwenza ngabaphansi.
Sibuye sibe lesifundo kubazali esokuba lanxa ufuna izisebenzi, fundisa lezakho izingane imisebenzi ukuze ungangenelwa yimicabango yokugqilaza abanye. Imuli kaSinyoro yakhetha ukusetshenzelwa yadlulela ekudingeni isigqili esaphetha sibahlukumeza sisiyababulala ekugcineni .
Siyafunda njalo ukuba ukungaxoleli kwezizwe akuphindiselwa njengemuli. Sibona imuli kaSinyoro ikhetha ukuphindisela kuMasakade ukuhlukuluzwa ababekwenziwa njengesizwe kodwa bona bathatha umthwalo bawufaka emahlombe abo, bahlupheka inkosi isisala ukubasiza entweni abazenzela yona bengumndeni bengabikelanga inkosi yesigaba.
Siyafundiswa njalo ukuba eminye imihlobo yabantu ayidlalelwa njengaMasakade. Sibona iSakade elinguSukuzukuduma ligila imikhuba liqondiswa ngabaphansi balo, amadlozi, abadala, abathuleyo emaphutsheni akhe. Uyaziphendula abeyisilwane kumbe inyoka kusiya ngalokhu akuqambayo.
Baphila nzima oSinyoro lemuli yakhe.
Siyafunda njalo ukuba izisebenzi azithenjwa. UPayiva wathi esephiwe okwakhe wasuka koSinyoro basala bethuthwa bodwa nguSukuzukuduma abakoSinyoro. Lokhu kuveza ukuba abantu abasebenzayo balolwazi wena mqhatshi ongelalo njengoba sibona uPayiva exoxisana loSukuzukuduma ensitha.
Siyafundiswa njalo ukuba nxa sakhile sithethene, asibosizana ekuletheni imibono ezenza siqaphelise izihlupho ekuphileni. Sibona uSinyoro lomnkakhe bevumelana engozini yokuthumba umuntu abangamaziyo bethi licebo elihle kanti qha.
Siyafunda njalo ukuba ukulalela izisebenzi lakho kuqakathekile. Sibona imuli kaSinyoro isekela ukuhlola izizatho zokuphenduka kukaZimba ekuyeni thumba isisebenzi esasizagqilazwa.
Sifunda njalo ukuba okungapheliyo kuyahlola. USinyoro waphelelwa yibuqili bakhe
lomkakheuSukuzukuduma esegila imikhuba yabakibo.Asiqhubekeni kwelizayo.
