admin
Thokozile Mbedzi
INHLANGANISO yeAgritex isikhuthaze abalimi bengqoloyi kundawana zonke zelizwe ukuthi kabaqalise amalungiselelo okulima ingqoloyi.
Ekhuluma lentatheli kaMthunywa uDistrict Agritex Officer weBeitbridge uMnumzana Masawuso Mahocha uthe abalimi sokumele balungiselele ukulima ingqoloyi ngoba yisilimo esilinywa ngesikhathi somqando.
“Abalimi sokuyisikhathi sokuba balungiselele ukulima ingqoloyi iqala ukulinywa phakathi kwenyanga kaNkwenkwezi kusiya ekuqaleni kwenyanga kaNhlangula,” kutsho uMnu Mahocha.
Uqhubekele phambili esithi abalimi kumele bathenge yonke impahla yokulima efunakalayo baqoqe njalo lokunye okuzadingakala kuseselesikhathi ngoba njengabalimisi bakhangelele ukuthi njengoba abalimi betshaye inala yamabele kumele njalo kube lenala yengqoloyi.
“Abalimi sibakhuthaza ukuba benze amalungiselelo abo kuhle bengajahanga khathesi ukuze bathole ithuba lokukhangela impahla yabo nxa sebeyibuthelele ukuthi iyenela yini indawo abafisa ukuyilima.
“Umhlabathi kumele lawo uhlale ulungisiwe usulinde nje ukuthi inhlanyelo ifakwe phansi. Lokhu kuzakwenza benelise ukuthi bafake inhlanyelo phansi ngesikhathi esiqondileyo.”
Uphethe ngokuthi wonke amalungiselelo angenziwa ngesikhathi esiqondileyo abalimi balakho ukuthola isivuno esihle yikho nje bekhuthaza abalimi ukuba balungiselele kusaselesikhathi.
Online Reporter