Online Reporter
Nkosilathi Sibanda, esenkundleni yeLuveve
Chicken Inn 0-0 TelOne
NGUMQEQETSHI olodumo owake wathwala inkezo, kodwa lonyaka ezakibo zimhlanekele u-Joey Antipas.
NgoLwesine iqembu lakhe iChicken Inn belinxuse iTelOne enkundleni yeLuveve kumdlalo wesitshiya galolunye kuCastle Lager Premiership.
Ngemva kwemizuzu engu-90, unompembe wenze akuqhatshelweyo, waphela umdlalo, abadlali baka-Antipas behluleke ukuhlohla.
Kube yi 0-0.
Lo ngumdlalo wesithupha iChicken Inn iqeda kungutshiki lobhanqa. Isinqobe kanye kuDynamos nge 1-0, yanqotshwa yiSimba Bhora 1-0. Zimbi indaba lapha. Lokhe waba ngumqeqetshi kuligi ephakemeyo, u-Antipas kakaze abelempumela enje. Lalo iqembu leChicken Inn liyaqala “imihlolo” yempumela enjengale.
Akuthembisi, akuthabisi, inhliziyo zibuhlungu kubalandeli beChicken Inn. ITelOne yona ibuyele eNkabazwe imisila iphezulu. Ithole umklomelo emangweni. Seliqede imidlalo emine lingutshiki lobhaqa, linqobe kathathu, ladliwa ngokufanayo.
Ngemva komdlalo, u-Antipas ukhulume lentatheli ebukeka engumuntu odane kakhulu. Limtshonele esebuhlungwini.
“Inhlanhla isibalekele. Sibe lamathuba amanengi kodwa kwehlula ukuthi sihlohle. Yiyo inkinga esilayo,” kutsho u-Antipas.
IChicken Inn kumdlalo olandelayo ileMWOS, eLuveve ngeSonto.
Umqeqetshi weTelOne uHerbert Maruwa ukhulume kabanzi ngokuthi bekumele bayitshaye okuzwayo, ikakhulu kuhlandla lakuqala lomdlalo.
“Kuhle siphethe umdlalo lathi sibuyele silomklomelo. Akulula ukudlala leChicken Inn. Sesikhangele umdlalo ozayo sileBikita Minerals,” nguMaruwa lo.
Chicken Inn
D Bernard, A Chinda, K Mutenha (Makopa 80 mins), J Tulani , X Ndlovu, D Jaricha, N Ketala, M Charamba, M Bhebhe, T Mushaireni (Majika 75 mins)
TelOne
T Chilenga, W Navaya, A Dzumbunu, A Chapinduka, TvJaravani, T Macheke, B Mtigo, M Chiedza (Masilela 65mins) E Mafireka, G Bero (Ndlela 65 mins), L Murape.
