Abel Ndooka
Munyori weKwayedza
MUTUPO unogona kuvhura hurukuro, kubuditsa ukama nekushandura mutorwa kuva hama.
Mwedzi waGumiguru uno, pfungwa iyoyo yekuve vemhuri imwe chete inenge iri pakati pedandaro paMhemberero yeMutupo (Mutupo Festival), iyo inounza pamwe chete zvizvarwa zvemuZimbabwe kuti zvipemberere midzi nemagariro azvo kuburikidza nemimhanzi, kutaurwa kwenyaya dzechivanhu nekubuditswa kwetsika.
Mhemberero iyi, iyo yakarongwa kuitwa nomusi wa 3 Gumiguru paSherwood Golf Club, kuMabelreign, muHarare, ichange iine vaimbi vanoti Gift Amuli, Kurai Makore, Baba Harare naMbeu, ukuwo muimbi Dereck Mpofu ari iye achange achitungamira chirongwa ichi.
Cynthia Mare, Pah Chihera, Obert Chari, Tryson Chimbetu, Josh Meck naProgress Chipfumo ndevamwezve vachaimba pachiitiko ichi.
Chirongwa ichi chinosanganisirawo zviratidzo zvetsika nekutaura nyaya dzechivanhu, pachitarisirwa kuva nezvikwata zvinoti Kuwadzana KweVaripasi Mbira Group, Mbare Chimurenga Choir neGanya Up Dance Ensemble uye mutauri wenyaya Sekuru Gora. Pamwe chete, vachavaraidza vanhu vanopa nzira dzakasiyana dzekudyidzana nenyaya, mhanzi netsika dzakapfuudzwa kubva kuzera rakati kuenda kune rimwe.
Kukambani yeNyaradzo Group, iyo iri kutsigira mhemberero iyi, kudyidzana uku kunobatanidza kuchengetedzwa kwetsika (Unhu/Ubuntu), kuchengetedza, kuremekedza uye nharaunda.
“Mitupo yedu inopfuura kungova mazita zvawo. Inotakura manzwi emadzitateguru edu, kuremekedzwa kwemhuri dzedu nenyaya dzinotiudza kuti tiri vanaani,” akadaro mukuru weNyaradzo Group anoona nezvemazano nekudyidzana nevoruzhinji, VaTendayi Gwatiringa.
Mhemberero iyi inobuditsa pachena basa rinogona kuitwa nemabhizimusi mukutsigira zvetsika dzezvizvarwa zvemuZimbabwe.
Vaimbi, vatauri venyaya nevachengetedzi vetsika vanoda nzvimbo dzekugoverana mabasa avo, uku vechidiki vachidawo mikana yekuwana nekunzwisisa nhaka nemidzi yavo.
“Tsika dzinofanira kurerwa dzisati dzave zvinhu zvakangosara mupfungwa chete. Dzinoda mapuratifomu, rutsigiro nemasangano akazvipira kuisa mari mune zvetsika,” vakadaro VaGwatiringa.
Boka reNyaradzo rakatsanangura maitiro aro sekuisa mari mupuratifomu inoita kuti vana vakwanise kudzidza nezvemidzi yavo, zvizvarwa zvemuZimbabwe zvigone zvakare kusangana nekuzivikanwa kwavo.
Kukoka ikoku kunoendawo kuvateereri nevatariri.
Vanhu vari kukurudzirwa kupfeka hembe dzechivanhu kana “kupfeka mutupo wako”, zvichiita kuti kubudiswa kwetsika kuve chikamu chekuungana padandaro nekunze kwedandaro.
Pamwoyo pemhemberero iyi pane pfungwa inoti: Nhaka inoramba iri mhenyu vanhu vakaungana kuti vaite, vagovane nekupa mazera anotevera nzvimbo munyaya yacho.
Online Reporter