adminTafadzwa Mutsotso
MURUME anova chizvarwa chekunyika yeFrance akabongomora kuchema mudare mushure mekunge mudzimai wake amumhan’arira achiti ari ane tsika yekupota achimuhwandira nekumuronda mafambiro ake, pashure pacho omurwisa.
Wias Arizon akaridza mhere mudare reHarare Civil Court apo akange amhan’arirwa nemudzimai wake, Caroline Shumba, uyo aida gwaro rekuti asasvike kumba kwake nemhaka yekuti ari kumushungurudza.
Arizon anoti hazviite kuti arege kusvika kumba kuri kugara Shumba sezvo achida kuona mwana wake. Akabva angoikwetsura mhere.
Shumba anoti Arizon anogara achimurova, kumutuka nekuda kumucheka nebanga.
“Ndakatotiza kubva kumba kwataigara mushure mekunge ndaona kuti baba ava vangangondipfuudza. Zvino ave kuita tsika yekuuya kumba kwangu achiti anoda kuona mwana asi osiya andirova nekurwisa ma’landlord’ avo vanoedza kundinunura,” akadaro Shumba.
Akaenderera mberi achiti: “Kutaura kuno akabva kumba kwake kuHatfield achinditevera kuSunningdle kwandiri kugara. Ava kugara paimba yechitatu kubva pandinogara inini.
“Haadi kundisiya, anoda kugara achindishungurudza. Akaisa tende pamberi pegedhi repamba pandinogara, ndimo maanoswera ari achitaimira kuti ndikangobuda chete, andibate ondirwisa. Ndaneta naye ini murume uyu,” akadaro Shumba.
Arizon, uyo akaudza dare kuti chizvarwa chekunyika yeFrance, anoti mashoko anotaurwa naShumba manyepo uye inzira yekumuvharidzira kuti asatore midziyo nemari yake zvaakatiza nazvo.
“Handimurove ini. Ndiye ega akatiza kumba nemwana nemidziyo zvose nemari yangu.
‘‘Hazviite kuti apihwe gwaro rinondirambidza kusvika kumba kwake. You can’t separate me from my son (Hazviite kuti mundisiyanise nemwana wangu).
“Mwana wangu, muri kuda kuti ndiite sei?” akadaro Arizon achibva atanga kuchema zvine ruzha.
Anoti haana kumbobvira arova Shumba.
“Ndinopika naMwari, mukadzi uyu handina kumbobvira ndamurova. Ari kuda kuti atize nemari yangu,” akadaro Arizon.
Mutongi Yeukai Dzuda akapa Shumba gwaro redziviriro.
Online Reporter