Ndapona: Mukadzi wekudya chevakuru

Adelaide Kapesi (36) wemubhuku raNgazimbi, kwaSadunhu Musonza, nguva yadarika akapihwa mubhedha muchipatara cheParirenyatwa Group of Hospitals, muHarare, umo airapwa mushure mekusununguka mwana waanonzi akapotsa adya ndokutozodziviswa nevaivapo.

Kwayedza haina kukwanisa kuziva kuti mudzimai uyu airwara nei apo aive muchipatara naambuya vake – Mbuya Euvon Kapesi (70) – vanove amai vababa vake.

Nemusi weChitatu svondo rino, Adelaide akatsinhira kuti akaburitswa muchipatara.

“Ndakabuda muchipatara, izvozvi ndiri kumusha kwedu kwaGororo, kuno kwaRusike. Mwana ari ‘right’, ini ndini ndinozongoda kutariswa chete nanachiremba ndichidzokera kumusha,” anodaro.

Anoenderera mberi achiti: “Ndakaenda kumusha kuti vakuru vamboona kuti dambudziko rinotaurwa iri, rekuti ndaida kudya mwana nekuzodya chevakuru changu nekunanzva ropa randaiva ndaburitsa pakusununguka, zvakabva kupi,” anodaro Adelaide.

Adelaide mudzimai waFanuel Purazi (36) uye mwana wavo ndewe kutanga.

Mudzimai uyu akasunungutswa naMbuya Julai Manyanyi (63) pamwe chete naMai Colleta Nyoni (63) avo vakaona mashura aya apo akadya chevakuru chake pamwe nekunanzva ropa raaive abuda pakusununguka.

Fanuel nehanzvadzi yake – Docus Purazi (41) – vanoti vakamirira kuti mudzimai uyu abatsirwe ozodzoka zvake mumusha mavo.

“Hongu, muroora wangu akaenda kumusha kwake uko ari kubatsirwa pachivanhu. Takangomirira kuti aite zvakanaka ozodzoka mumusha,” akadaro Docus.

Mashoko ake akatsigirwa naFanuel.

Sadunhu Musonza, VaKufandada Musonza, vanoti nyaya iyi haisati yauya mudare ravo sezvo nguva yadarika vakanga vavimbisa kuti vaizoda kushevedza sabhuku wemusha waNgazimbi nevekumhuri yakaroorwa Adelaide kuti vanzwe mafambiro akaita nyaya iyi.

“Havasati vauya kudare vanhu ava. Tine zvatiri kugadzirisa uyewo tinoda kuti mudzimai uyu atange aita zvakanaka sezvo achinzi akazorwara mushure mekudya ropa nechevakuru chake,” vanodaro Sadunhu Musonza.