derick.khumalo
Mthokozisi Ncube
“ALUBA ngathola elinye ithuba lokukhuluma laye, ngangiza mtshela ukuthi atshiye abuye ekhaya.”
La ngamazwi agcwele usizi kaVelile Khumalo (76), unina kaNothabo Zandile Tshuma (42), okusolwa ukuthi wabulawa ngumyeni wakhe, uNdodana Mkhanyisi Tshuma, e-United Kingdom.
UNdodana, oyisizalwane seZimbabwe njalo obehlala lemuli yakhe eBritain, wabotshwa eSouth Africa mhlaka 10 Ntulikazi ngemva kokusolwa ngokubulala umkakhe lamadodakazi abo amabili, uNatalie (15) loNala (5), emzini wabo oseGreat Denham eBedfordshire.
Ekhuluma lentatheli, uVelile uthe usetshiye konke kuNkulunkulu.
“Ngiyakwamukela kuphela lokho uNkulunkulu akuvumileyo. Isifiso sami yikuthi indodakazi labazukulu bami bangcwatshwe lapha eZimbabwe eLuveve Cemetery.”
Uthe uNothabo wayengumama olothando njalo amadodakazi akhe abethandwa ngumdeni wonke.
“UMaKhu wayelabantwana ababili akade eziqhenya ngabo kakhulu. Sebehambile bonke. Enye indodakazi yami ilabafana kuphela.
Amantombazana wonke asephelile,” kutsho umama kamufi.
Udadewabo kaNothabo, uSibonginkosi Gugulethu Mungoni, uthe umdeni uphatheke kakhulu ngokulahlekelwa.
“Wayeyintandokazi yomdeni. Sasihlala sikhulumisana njalo ubuhlungu esibuzwayo abungeke buchazwe ngamazwi. Sicela abantu basivumele sikhale ngokuthula.”
Umalume kaNothabo, uLeon Leroy Khumalo, ucele abantu abasebenzisa inkundla zokuxhumana ukuthi bayekele ukusabalalisa imbiko engaqinisekiswanga.
“Njengemuli sicela abantu bayekele ukuqamba amanga ngodaba lolu. Sicela lentatheli zisiphe isikhathi sokukhala ngoba silahlekelwe,” kutsho uLeon.
Imuli ithe amalungiselelo omngcwabo azavezwa nxa iziphathamandla zeBritain sezikhulule izidumbu njalo yonke imithetho isilandelwe yaphela.
Ukuhlolwa kwezidumbu kuveze ukuthi uNothabo lamadodakazi akhe babulawa ngokutshaywa kabuhlungu.
UNdodana wabaleka eBritain mhlaka 5 Ntulikazi esiya eSouth Africa, lapho abotshelwa khona. Izidumbu zomkakhe labantwana zatholakala ngosuku olulandelayo ngemva kokuba omakhelwane bebikele amapholisa.
