admin
UKHULU uTshidiso Mophethe (64) ukholwa ukuthi amagundwane athunyelwa ukuzombulala.
UMnumzana Mophethe ukhuluma amazwi la nje ngemva kokuqunywa unyawo osekubangele ukuthi asebenzise unyawo olulodwa.
UMophethe wahlaselwa ngamagundwane adla amazwane akhe ngoNhlolanja.
Amagundwane aqhubeka esidla amazwane akhe okwabangela ukuthi aze alaliswe esibhedlela waqunywa unyawo lwesandleni sokudla ngaphansi kwedolo.
UKhulu uMophethe ucabanga ukuthi amagundwane la athunywa ukuthi azomudla ephila aze ambulale.
“Ngibona angathi amagundwane la athunywa kimi ngoba kawahlaseli ezinye izihlobo zami loba zingaze zingivakatshele.
“Ngeke ngisuke emkhukhwini wami njalo ngizafunda ukuphila ngingelanyawo nxa ngingathola inqola yokuhamba,” nguKhulu Mophethe lowo.
Ubikele iphephandaba leDaily Sun: “Ngangingakaze ngicabange ukuthi ngingaqunywa unyawo ngenxa yamagundwane. Impilo yami isifana nje lomuntu oseGehena njalo sengizamile konke ukuthi ngixotshe amagundwane la angidla ngiphila.
“Amagundwane la kawadli umuthi ofakelwe ukuthi uwabulale, kodwa adla inyawo zami. Ngangicabanga ukuba angadla amazwane ami lenzipho, azadlulela phambili, kodwa ngangizikhohlisa. Aqhubeka engihlasela kodwa kakaze ahluphe omakhelwane bami. Unyawo lwami lwaqala ukubola lwaseluqunywa ngoMabasa. Ngithwele nzima ngoba ngidinga inqola yokuhamba kanye lendlela yokuxotsha amagundwane la ngingakaqunywa olunye futhi unyawo.”
Umakhelwane uNtaoleng Sebela (33) uthe: “Kangikaze ngibone loba elilodwa nje igundwane egumeni lami. Kwakunzima ukuthi simkholwe esitshela ukuthi kulamagundwane emkhukhwini wakhe. Kodwa khathesi sengikukholwa ngoba inzipho zakhe zanyamalala khathesi kasela nyawo. Mhlawumbe ngamagundwane athunywa ukuzomtshabalalisa,” kutsho uNtaoleng.
Isangoma uMalefu Motlatsi uthe iguma likaMophethe kumele ligeziswe.
“Kukhanya kulomuntu ofuna ukumtshabalalisa esebenzisa amagundwane. Iguma lakhe kumele lihlanzwe. Ngiyenelisa ukumsiza nxa engathenga inkukhu emhlophe,” kutsho uMotlatsi.
Online Reporter