admin
YiNtatheli kaMthunywa
UMDLALI wenguqu uKnox Mutizwa usezibazele inkalakatha yomthwalo ngokuthembisa ukuhlohla amabhola azancedisa ukuthi aphakamise iqembu lakhe leGolden Arrows ukuthi liqakame kuliviki ye-Absa.
UMutizwa ubikele abalandeli bakhe kuliviki wathi uhlezi elindile ukuqala kwebhola lenyawo eMzansi ukuze abonise ukuthi uyinsika yokuphumelela kweGolden Arrows, ekhangelele ukuthi iphethe isizini ibalelwa kumaqembu ayisitshiya galombili aphezulu kulogu.
Umgadli lo owasuka kuqembu leHighlanders kuleli, usehlohle amabhola angu-11. Uhlezi izithende abadlali asebekhokhela ngokuhlohla ababalisa uGabadinho Mhango oweOrlando Pirates olamabhola angu-14.
Ekhuluma ngamalungiselelo akhe, uMutizwa uthe mhla amagedi enkundla evulwa eSouth Africa, uzawathela elandelana amabhola emanethini.
“Nxa iligi ingavulwa, ngilethemba lokuthi ngizahlohla okuzwayo ngenelise ukuncedisa iGolden Arrows ukuthi iphethe isizini ikumaqembu angu-8 aphezulu,” kutsho lumdlali osephenduke waba yintandokazi ku-Arrows.
Ebuzwa ngokusondelela kwakhe isicoco sokuhlohla, umdlali lo uthe: “Ngizaqhubeka ngisebenza nzima. Angikafiki kusibanga sami saphezulu ngakho ngizaqinisela ukuze ngifeze iphupho lami.”
IGolden Arrows ihlezi kunombolo yesikhombisa kuligi ye-Absa ilemiklomelo engu-32 kumidlalo engu-23.
Online Reporter