admin
NXA uJan Kekana lomkakhe behamba ezitaladeni abantu bahamba bebakhangela yonke indawo lokhu kungenxa yokuthi yena mude okungaba yi- 1,05m kuthi umkakhe yena uyi-1,6m!
Lindoda eleminyaka yokuzalwa engu-33 ingumbhishophu kubandla le La Galelia Apostolic Church eKatjibane, indawo eseMpumalanga, kweleSouth Africa njalo ithe yona lomkakhe uPhumzile (28) sebeleminyaka engu-11 bebonke njalo batshade kuminyaka emine edluleyo.
UJan ubikele iphephandaba leDaily Sun ukuthi: “Abanye abantu abenelisi ukujayela indlela esiyiyo, kodwa omakhelwane bethu bathi sifanelene yiloba nje ubude bethu bulokwehlukana okukhulu.”
UPhumzile uthe unina wakhe ongasekho emhlabeni wayejayele ukukhuluma ngoJan kakhulu njalo wayefuna bahlangane.
“Ngaze ngahlangana laye ngoZibandlela ku2005 elande ukuzangikhulumisa ngemfa kamama.
“Ngalesi sikhathi wahle wangitshengisela ukuthi uyangithanda sahle saqala ukuthandana,” nguPhumzile lo.
UJan uthe uyakholwa ukuthi uninazala nguye owatshiya emlungisele indlela yokuthi aphilisane lomkakhe.
“Kwahle kwabasobala ekuqaliseni ukuthi uyangithanda uPhumzile.
Uthando lwakhe kimi lwenza labangakibo bangamukele,” nguJan lo.
Laba ababili balabantwana ababili uNombulelo (11) loKhutso (6).
UJan, osebenza engu-administrative clerk weKruger National Park, uthe abantu babehlala bemangala nxa bembona etshayela imota yakhe esiya emsebenzini.
“Ngenxa yobufitshane bami ababantu bayamangala nxa bengibona ngitshayela imota kodwa kulula kabi.
“Engakwenzayo nje yikulungisisa ukuthi ngifinyelele imiqobotsho kunye leaccelaratot,” nguJan lo.
UJan ukhuthaze abantu ukuthi bamukele abantu abakhubazekileyo ethi akulanto angenelisi ukuyenza uyindoda njengamanye amadoda. — Ubulembu
Online Reporter