Ngqwa lomculi oyimbongi

KulIVIKI bakaMalandela iphephandaba likaZulu lithe like likhumbuze uMthwakazi ngezihlaba umxhwele nanku phela lize lendoda mdabuko ijaha elimajaha mabili elaziwa ngokuthi nguKelvin Bakhokheli. Lelijaha lenza iziga kwezomculo kanye lenkondlo ezivusa usinga liphuma elokitshini leMganwini edolobheni lakoBulawayo. Kayiculi nje lindoda ligiyafefe, kwezenkondlo ingena kuphume uluju emlonyeni, kutsheke ibhatshi endodeni.

BakaMthwakazi, lingaze lakhutheka endabeni ezimnandi, nansi ingadlangadla yomculi oyimbongi njalo engumlobi ebizwa ngokuthi ngu-Kelvin Tshuma (KT) uxoxa lentatheli yephephandaba likazulu uCornelius Luphahla (CL) mayelana lezomculo, ubumbongi kanye lokucula kwakhe. Ofisa ukuqumbaqumbeka kaphatheke kule ingxoxo ezayo.

CL: Akubikele umphakathi ngadlangadla mayelana lembali yakho kanye leyomculo wakho?

KT: Mina ngazalwa mhlaka 7 Mfumfu 1992 ePlumtree esigabeni sakoNgwanyana. Ngasuka lapha-ke sengikhulakhulile ngayangena uGiredi 1 ngo-1999 eSenzangakhona Primary School elokitshini leMganwini koBulawayo. Ngafunda lapha ngaze ngaqeda uGiredi 7 ngasuka lapho ngayafunda uFomu 1 eMabhikwa High School eLupane ngo-2006 kwathi ngo-2007 ngasuka ngayafunda eZwangendaba High School eLupane njalo ngasuka ngo-2008 ngayafunda eMganwini Secondary School koBulawayo. Kwathi ngo-2011 ngayafunda eNkulumane High School koBulawayo okuyikho engaqeda khona ngo-2012.

Ezokuloba ngaziqala ngisafunda kanye lezobumbongi noma nje ngangingakaziwa emphakathini. Ekulobeni ngaqala ngisaloba inkondlo ngathuthuka ngaloba ingwalo noma nje khathesi zingakapapatshwa. Inkondlo lezi ngangizenza emikhosini etshiyeneyo esikolo ngithola imivuzo kwaya ngathuthuka zengize ngisaziwa koMthwakazi ngokugiya lokhu.

Ukuhlabela khona ngikuqale ngo-2010 noma nje bengingakaziwa kodwa bengilazo ingoma zami engazisungulayo. Kwaya-ke kwathi ngo-2015 ngakhupha idlalade elilodwa elithi Amadelakufa elikhuthaza ngokuvuselelwa kwamasiko kanye lobuzwe bukaMthwakazi. Kulelidlalade ngangicula ngibuye njalo ngihaye kuhele kozeleyo.

CL: Tshela uMthwakazi jahelibanzi ukuthi abantu bathini ngomsebenzi wakho njalo ukhangelele ukwenzelani uzulu lonyaka?

KT: Abantu bayajabula kakhulu ngomsebenzi lo engiwenzayo njalo bayawuncoma bangikhuthaza ukuthi ngilibambe lingaze latshona njengoba nje ngiyibambe esidukwini indaba yezamasiko.

Ngenxa yalokhu-ke uMthwakazi ngimthembisa elinye njalo idlalade eligijimisa igazi livuse usinga endodedeni. Leli dlalade sengiqeda ukulipheka ngakho uzulu kahlale elindile ngoba lukhulu luyeza. Okunye njalo ngikhangelele ukupapatshisa ingwalo zami kuwonale umnyaka ngizwise uzulu uluju lwezamasiko.

CL: Njengomuntu odume ngezimnandi wandise ukujabulisa ngaphi umphakathi nyosi yodumo?

KT: Mina njengomhlabeleli oyimbongi abuye ngandise ukujabulisa uzulu emidlalweni kumbe emikhosini etshiyeneyo lapho engiyabe ngimenywe khona. Kwesinye isikhathi ngiyake ngimenywe emitshadweni, emadilini okuzalwa kanye lakwezinye indawo.

Ngalokhu-ke khathesi ngikhangelele ukuvakatshela indawo ezehlukeneyo ngijabulisa abantu ngokubenzela ama-shows endaweni ezehlukeneyo.

CL: Ngaphandle kokucula msebenzi bani owenzayo Golide?

KT: Mina ngaphandle kokucula lokugiya ngingathi ngibambe zimawele okuyikuthi ngiyahlabela njalo ngiyazisebenza ngokuthengisa impahla. Okunye njalo ngiyafunda e-University yeLupane ngakho ngikhangelele ukuqeda ngo-2017.

CL: Bunzima bani oyake uhlangane labo njengomculi njalo nkuthazo bani oyipha abaculi abasacathula?

KT: Njengomuntu odume ngezokujabulisa uzulu ubunzima engiyake ngihlangane labo yikusweleka kwemali yokukhipha amadlalade kanye leyokuthenga imitshina yokutshayisa ingoma zami. Okunye njalo njengomculi osanda kusungula ngiyake ngihlangane lobunzima bokuswela abalandeli abanengi njengoba nje inengi belingakabi ngazi.

Ngalokhu-ke kubaculi abasacathulayo ngithi kababambe ziqine ngoba umsebenzi lo unzima udinga umuntu obekezelayo. Okunye njalo ngithi kabahloniphe uzulu ukuze bathole usekelo olukhulu koMthwakazi.