admin
ABANTWANA besikolo sebezanikwa ukudla ezikolo kulandela ukuvulwa kwesikhwama semali engange $200 miliyoni yiKhabhinethi ngemva kokunanzelela ukuthi indawo ezinengi elizweni zikhangelane lendlala.
Ngaphansi kohlelo lolu kukhangelelwe ukuthi abantwana besikolo abayizigidi ezine bathole ukudla kusukela kuthemu ezayo. Kubikwa abafundi bazaphiwa ukudla kwekuseni okulilambazi kuthi emini badle isitshwala lendumba kumbe umbhida njalo kukhangelelwe ukuthi uhlelo lolu luqale endaweni ezihlaselwe yindlala ukwedlula ezinye.
Umsekeli kaMphathintambio wogatsha lwezemfundo yangaphansi leyaphezulu uSikhwicamfundo Paul Mavhima ubike ukuthi uhlelo lokudla lolu luzaqhubekela phambili isikhathi sendlala size sedlule.
“UHulumende uvumile ukuthi kusungulwe isikhwama sokunikeza abafundi ukudla esemali engange $199 miliyoni.
Lokhu kutsho ukuthi kuzakuba lengxenye yalimali ezavela kuFood Relief Programme,” kutsho uSikhwicamfundo Mavhima.
Abafundi bazaphiwa ukudla ngobudala babo kusiya ngokudla okuyabe kutholakele. Kuzaqaliswa ngabancane njalo sizaqala ngokukhangela indawo ezihlaselwe yindlala kakhulu. Okufunekayo yikuthi abafundi bathole ukudla kabili ngosuku kodwa ekusunguleni loluhlelo sizaqala ngokubapha kanye ngosuku,” nguMavhima lo.
USikhwicamfundo uMavhima uveze ukuthi uHulumende usebenza labengqubekelaphambili abafana leUnicef kanye lezinye inhlanganiso ukuze bamanyane uhlelo lolu luphumelele. Wengezelele wathi bazadinga njalo abangaphathisa ngempahla yokusungula ama irrigation ezikolo ukuze kulinywe izilimo ezivandeni zezikolo abantwana bathole okokudla.
Kubikwa nyakenye abafundi abangaba yi-3 000 esabelweni seMatabeleland South bekela isikolo ngenxa yendlala.
UMavhima uveze ukuthi basebenzelana labogatsha lwezokulima kanye labe-Social Welfare kuhlelo lolu.
UMphathintambo we Public Service, Labour leSocial Welfare uPrisca Mupfumira uveze ukuthi ngeviki ephelileyo ilizwe belisele lokudla okungalinganiswa le-99 000 tonnes zomumbu ezingenela izinyanga ezintathu.
Uthe imizamo yokuthenga umumbu kwamanye amazwe isiqalile.
“Uhlelo lokupha abafundi ukudla ezikolo luzasungulwa ngoNkwenkwezi njalo abantwana abazaqala ukuphiwa ukudla ngabancane abakubanga lika-Giredi 0 kusiya ku-2. Sizabe singenisa amanye amaGiredi kuhlelo lolu ngokuya kwesikhathi sikhangelisisa indawo lapho okudingakala usizo lokudla khona,” nguNkkz Mupfumira lo. — Sunday Mail
Online Reporter