Online Reporter
Nkosilathi Sibanda
NGEMVA kokuqhuba umjaho weHighlanders Fun Run nyakenye, iHighlanders Athletics Club (HAC) lonyaka ikhangelelwe ukuthi iphathe umjaho we-half marathon mhlaka 5 Mfumfu.
Kuzakuba lemincintiswano kumbango ye-21km, 10km le5km.
Umgcinisihlalo weHAC, uLawrence Phiri uthe bayajabula ekuthini sebenelise ukukhweza isisindo somncintiswano lo njalo baphezulu kwamalungiselelo.
“Emjahweni wethu wakuqala nyakenye sigijime ku-10km le-5km kuphela.Kowalonyaka sinqume ukufaka umjaho we-21km njengendlela yokuhuga abagijimi abanengi abasezingeni eliphezulu. Uluhlu lwemiklomelo luzamenyezelwa ngokuhamba kwesikhathi,” kutsho uPhiri.
Uthe ngo-2024 kwakulaba gijimi abangu-150, ngakho lonyaka bakhangelele ukwedlulisa inani leli.
Umjaho uzaqhutshelwa eHighlanders Sports Club.
“Sithanda ukubika ukuba siyamukela ukubambana lamanye amabhizimusi lengatsha ezifuna ukuba yingxenye yomjaho wethu,” kutsho uPhiri.
“Sikholelwa ekwakheni amabizo abaxhasi bethu ngokuqoqa umjaho ozanxusa wonke umuntu.”
Ubike ukuba umjaho lo uyingxenye yokuthakazelela ukufikisa iminyaka elikhulu kweqembu leHighlanders ngo-2026.
Kusenjalo, iNational Athletics Association of Zimbabwe (Naaz) ithe izaqhuba inhlelo zezifundo zokuqeqetsha ngoNcwabakazi koBulawayo.
Izifundo lezi zizaqhutshwa ngaphansi kwenhlanganiso yeWorld Athletics, enkundleni yeWhite City Stadium koBulawayo.
Umqondisi weNaaz, uManuel Mpofu uthe izifundo zigoqela ezeWorld Athletics Level 1 (5–16 Ncwabakazi), World Athletics CECS Level 2 (19–30 Ncwabakazi).
Kusukela mhlaka 2–6 Mpandula, iNaaz izaqhuba i-World Athletics Lecturer Training Course, leRegional Development Centre (RDC) Level 1 Coaching Course kusukela mhlaka 9–20 Mpandula.
“Sizimisele ukuqhuba inhlelo lezi njalo konke okufunekayo sekuqoqiwe. Sisebenza ndawonye lenhlanganiso yeWorld Athletics leRegional Development Centre
“Leli lithuba lokuthi labaqeqetshi bakuleli bathole ulwazi oluzaphathisa kakhulu ekukhuliseni umdlalo wethu. Kuzabe kulababalisi labaqeqetshi abavela kwamanye amazwe, okuyikhona okwenza sizigqaje ngokuphatha izifundo.
Inhloso yethu yikuthi sibe lohlelo oluzabatshazwa zonke indawo, luphakamise abaqeqetshi labagijimi bethu. Okwethu okumele sikwenze yikulungisa indawo zokuhlala lakho konke okufunekayo.”
