admin
Nkosilathi Sibanda
USETHOLE idlabuzane lokuligaxa entanjeni njalonje umgadli weHighlanders, uPrince Dube nanko phela useqede umkhankaso wenkezo yeChan ekhokhela ngamabhola.
Phakathi kwabo bonke abagadli abathenjiweyo emazweni ancintise ukungena kumidlalo yalinkezo, uDube, owaziwa ngelithi “Mgadafi” uphume ehamba phambili wanconywa yinhlanganiso yeConfederation of African Football.
UDube ubhoboze igedi kahlanu, kumabhola angenise iZimbabwe kuma-final alinkezo ezancintiselwa ngomnyaka ka-2020.
Umdlali olandele uDube kube nguPatrick Kaddu oweqembu le Uganda.
Ukuphumelela kukaDube kujabulise lomqeqetshi wamaWarriors uJoey Antipas obike ukuba umdlali lo kumele aphakamise umdlalo wakhe ukuze ayekhatshana emdlalweni.
“Umdlalo kaPrince uyathokozisa. Uzimisele, yikho esenelise ukuthi ahlohle amabhola ancedise isizwe ukuthi siyephambili kumncintiswano weChan. Loba ehlohle amabhola la, ngimkhuthaza ukuthi aqhubekele phambili,” kutsho uAntipas.
AmaWarriors angene kuma-finals eChan lapho azadinga khona ukunqoba amazwe abalisa iCameroon (ezaphatha umncintiswano), Morocco, Tunisia, Mali, Guinea, Togo, Niger, Burkina Faso, DRC, Congo, Uganda, Rwanda, Tanzania, Zambia leNamibia.
Uselinganiswa labadlali abadla ubhedu ngokungenisa amaWarriors kumidlalo yaphezulu uPrince.
Lanxa isizini yakhe yeligi yalonyaka leBosso ibinzima nanko phela iqembu leli yikho liqala ukusukuma, uPrince usezakhele udumo oluzamenza enelise ukuthi abizwe njalonje eqenjini lesizwe.
Iphephandaba lixhumane loDuduzo Ncube ongumlandeli omkhulu weqembu lesizwe othe kuhle kakhulu okwenziwe nguPrince Dube.
“Ukukhula kunguqu kuqala ngokwenza kuhle kuqembu lesizwe. Uzadlala emazweni khathesi uPrince.”
Online Reporter