Online ReporterPeter Matika
INDODA ebihlupha ngokugqekeza eMahatshula koBulawayo, kubikwa ibizo layo nguJoseph Phiri.
UPhiri lo, oleminyaka engu-28 yokuzalwa, nguye odume kuviki ephelileyo ebonakala kuvidiyo kunkundla zokuxhumana, ezama ukugqekeza kwenye indlu eMahutsula ebusuku.
Amapholisa koBulawayo abike ukuba uPhiri usolelwa kwamanye amacala enziwa phakathi kukaZibandlela walonyaka kuze kube lakhathesi.
Kumbiko okhitshwe ngoLwesine, amapholisa athe uPhiri usolwa ngokuba yingxenye yeqembu elalihlupha abantu ngodlame eMahatshula lakwezinye indawo.
Kuthiwa ekuqaleni, uPhiri wayesebenza loChallenge Lucky Neta (38), Trust Adam Mubyumbi (35) loWellington Nyakurima, owaziwa ngokuthi nguDombadomba (33), bagqekeza ezindlini eziyikhombisa.
Leli iqula kuthiwa lalihlasela lisebenzisa ingqamu, induku lemvubu lemibhobho.
Amapholisa athe laba bobathathu asebebotshiwe basejele leKhami lapho abagcinwe khona belindele ukwahlulelwa kwamacala abo.
Uphenyo luveze ukuthi ngemva kokubotshwa kwabanye abasolwa, uPhiri kuthiwa waphinda waqala elinye iqembu lokugqekeza, wenza amanye amacala amabili eMahatshula East.
Kuthiwa wasebenza loPauros Hadebe, owaziwa ngoMengezi, Oscar Ndlovu owaziwa ngokuthi nguMao loJomo Chomu.
Kwesinye isehlakalo, kusabalale ividiyo le enkundleni zokuxhumana ebonisa umsolwa ezama ukugqekeza endlini
Amapholisa okwamanje asecela ulwazi olungenza kubotshwe uPauros Hadebe, Oscar Ndlovu loJomo Chomu.
“Abantu abangabe belolwazi mayelana lokuthi laba abasolwa bangabe bengaphi bacelwa ukuthi baxhumane leNational Complaints Desk kulezi zinombolo: (0242) 703631 kumbe WhatsApp 0712 800 197, kumbe baye enkambeni yamapholisa eseduzane,” kutsho amapholisa.
