Online Reporter
Nkosilathi Sibanda
NGESIKHATHI umhlaba wonke ukhangelele ukuthi uKenneth Mhlophe uzakhitshwa esikhundleni, umgcinisihlalo weHighlanders lo limtshonele elokhe ezibambile intambo eqenjini.
NgeSonto edluleyo, amalunga oqobo eqembu leHighlanders ebethe gwaqa kumhlangano we-Extra Ordinary Meeting (EGM) eClub House, lapho okwethulwe umbiko kaMhlophe lokamgcinisikhwama, uNkani Khoza.
Bobabili yibo abakade kuhlelwe ukuthi bakhulume lamalunga angu-138 akade ekhona.
Isikhathi sonke lesi, kusukela kuqala uNkwenkwezi, kumaqula amalunga labasekeli beHighlanders abakade bekhankasela ukuthi uMhlophe kumele akhutshwe, kubaliswa ukuthi uyehluleka umsebenzi awukhethelwayo. Bakhala ngokuthi iqembu kalenzi kuhle emidlalweni, kalithengi abadlali abalohlonzi lokumemetheka kobungilimbane emahofisini, kulandela ukubotshwa kukaBrian Moyo owayengumaqhuzu.
Phezulu kwalokhu, amalunga angazwisisani loMhlophe, ethesa umgcinisihlalo lo icala lokuthi useyekele iqembu kwaba ngumhlambi kazelusile.
Umhlangano ungakaqalisi, bekuvuke umoya wokuxabana kumaxuku abalandeli. Lalabo abangela amakhasi wokuba ngamalunga oqobo bebephethe impembe, beklabalala ukuthi uMhlophe kumele akhitshwe kumbe aziphumele ngokufuna kwakhe.
Lakanye, bathe bengena umhlangano, bebecabanga ukuthi indaba esegudwini yikukhitshwa kukaMhlophe, ikanti kababuzanga elangeni.
UMhlophe, ephuma emhlanganweni, kazange ayiphathe eyokuthi bamfuna aphume esikhundleni. Uthe ujabulela ukuthi konke kuqhube kakuhle.
“Sibe lomhlangano omuhle. Sethule okumele kwethulwe kumalunga ethu, ngakho sibe lelanga elihle,” kutsho uMhlophe.
Kusenjalo, umgcinisikhwama uNkani wazise amalunga ukuba iHighlanders ikhululekile ukusebenzisa imali evele kusomabhizimusi uWicknell Chivayo.
“Usekelo lwemali luza lemigoqo ethile, kodwa iqembu likhululekile ukusebenzisa imali evela kuChivayo ngendlela ebona ifanele,” nguNkani lo.
Amalunga akade ekhona atshele intatheli ukuthi umsindo obukhona mayelana ngobukhokheli bukaMhlophe ubujonge ukuphazamisa inhlelo zeqembu.
“Lo bengumhlangano we-EGM obizelwe ukuthi sizokuzwa umbiko kamgcinisihlalo lomgcinisikhwama. Kwabekwe kwacaca lokhu. Asikaze sithi ukubamba inhlwa ngekhanda kuHighlanders, konke kumele kulandele umthetho,” kutsho omunye wamalunga eqembu.
