adminMunyaradzi Gunduza
9. TSANANGURA rayiro dzinobuda munhetembo dzenhango dzepadare. [25]
Cherechedzo: Mudzidzi ngaanyore nhanganyaya inotsanangura nhango dzepadare.
Ngaape pfungwa sere kana kudarika dzakatsigirwa netsananguro dzinobva munhetembo dzacho. Mudzidzi ngaasashandisa nhetembo imwe chete kanodarika kaviri.
Muroyi haana mugoni, haanei nokuti wamunatsira kana kumutadzira anongokuroya zvakadaro sepanonzi, “Ukamupa wafa – umunyime wafa” mudetembo rinonzi, Muvengi muroyi.
Shanje dzakaipa sepanonzi, “Vakaipa vanofanana nevaroyi
Vane shanje nepfini mumwoyo yavo.”
Pfambi dzinoparadza upenyu hwevanhurume sepanonzi, “Pfambi haitsvagi kuwanikwa,
Chayo kukugura mabvi wakatarisa” mudetembo rinonzi Pfambi haidyi chebamba.
Kugona kupanda nyaya padare raShe sezviri mudetembo rinonzi, Kupanda nyaya.
Munhu ngaasarasa tsika dzake nokutoredzera dzevamwe vasiri verudzi rumwe naye sezviri kuita vana vemazuva ano vava kutoredzera zveChiRungu vachirasa tsika namagariro avo eChiShona mudetembo rinonzi, Nondo mumbizi sepanonzi, “Mwoyo yavana yapepetwa neChiRungu,
Ugo nounomwe hwetsika dzamadzibaba edu
Hazvichina nzvimbo muhana dzavo” uyezve pamwe panonzi, “Tsika dzamagariro edu dzadzama samadora
Nemhaka yokushaya achadzicheuka.”
Kuchenjerera njodzi muupenyu semudetembo rinonzi, Charehwa ibembera panonzi, “Hapana chisingaurayi
Demo rinotema,
Pfumo rinobaya
Banga rinocheka
Tsvimbo inorova
Mbodza inozvimbira.”
Kugona kubata imba kwemusikana achangoroorwa. Raviro mudetembo rinonzi, Kuraya anorayirwa kuti asaite ruchiva nokuti aroorwa, achigutsikana nemurume wake mumwe iyeye panonzi, “Zvamesomeso ibva wasvipira pasi,
Zvoumhandara nhasi zvakuva samazhanje” Anorayirwawo kuti ave neutsanana uye kuti asiyane namakuhwa nokuti anoputsa musha panonzi, “Ufende siyana nahwo” uye panonzi, “Guhwa regera, imhunzamusha” Anorayirwawo kuti ateerere murume, kwete kuenzana masimba nomurume mumba.
Cherechedzo: Tambanudzai mhinduro iyi muchipa dzimwe pfungwa dzinobuda munhango idzi semaonero enyu.
Apa ndipo paperera bhuku rino. Tinotanga rimwe svondo rinotevera.
Online Reporter