adminOphezulu Stinta
Sisaqhubeka lendatshana yethu lapho esatshiya khona uMaNkosi ekhala ngendodana yakhe eyahamba kudala isiyalwela impi yenkululeko. UNdlela yena wayelokhu elethemba ukuthi indodana yakhe uzayibona ngamehlo.
Kukhanya lapha uNdlela induduzo alayo yayingeyokuthi yona bonke labo ababehambele impi yenkululeko, abanye bakhona abasebedumile kucaca kwakulohlelo olwaluzaphuma kumabonakude luveza amadodana olahleko esephenduka ekhaya.
Babezakwamukelwa esilindweni sendizamtshina abantu bonke bebukele kumfanekiso kamabonakude. UNdlela wayekhangelele ukuyibona indodana yakhe lapho loba nje uMaNkosi wayengalathemba sewalahla imbeleko, umuntu owayezithulele zwi engabhali ngitsho lokubhala.
Latshaya ihola elingaliyo uNdlela wayesehlezi phambi kukamabonakude. Bafoliswa ngobunengi babukiswa bonke ababephephile. Bobabili bambona uSizwe indodana kamakhelwana wabo. Wayesekhulile eseyindoda kuzwa.
Amehlo kaNdlela ayengasacwayizi lapho esewavule ephelele edinga ongowakhe. Bakhangela bebuzana ukuthi kambe ngabe babephiceka na, kungani uSizwe benelisa ukumbona basebengadidwa yingane yabo. Wabuya wayiqala ingoma yakhe uMaNkosi le ayelokhu eyiculela umkakhe ethi uManqoba kade wedlula emhlabeni uthi “akekho ongabonakali, ongaveliyo ngongekhoyo. Ngowafela emazweni njengoManqoba” wayesebutholile ubufakazi obeneleyo ukthi ingane yakhe yedlula emhlabeni.
Pho uNdlela wayengathemba kukuphi esezibonele ngawakhe amehlo ukuthi wayengekho kulabo abavelayo.
Wasiqhinqa isililo uMaNkosi, kusenjalo kwaqoqodwa emnyango. Kwangena uSizwe owafika wababingelela ngokuzithoba.
Ndlela kazange athande ukuphozisa amaseko wayesefuna ukuzwa ngendodana yakhe lapho uSizwe aphendula ethi “wasala enkundleni kubhekwene mama.” kazange ayiphutshe inkulumo yakhe. Wahle wayifunda ivalilwe uNdlela. Wayesekhathazekile ngentombi kaManqoba, uNontobeko ingane yabantu yayisihlale isikhathi eside ilinde umoya.
Wabaduduza uSizwe ngelithi bangakhathazeki ngaye lowo wayesekwazi konke. USizwe lo yena wayengatshengisi ukwethuka loba nje khona ukukhathazeka. Wayebabaza nje amandla othando okwasekumphica laye uNdlela.
UManqoba wavula umnyango ngenjabulo ememeza ethi inkululeko ibuyile, nangu loManqoba kusobala ukuthi umanqoba kazange alinde ukuthathwa umfanekiso esilindweni sendizamtshina wahle wathathela wayadinga uNontobeko wakhe.
Online Reporter