adminCharles Dube
Kungaphi lapho okuthiwa kukompi kayideli? Kulapho okuhlezi kuliwa khona, kuchitheka igazi njalo nje. Nxa sisehla lenkondlo sizwa ukuthi lindawo yi-Africa. Abantu be Afrika,abaNsundu phela, bachazwa njengabantu abahlezi besilwa.
“Kukompi kayideli lapha,ilanga livutha njalo nje, igazi lichitheka kokuphela, “Kufa abantu abanengi ngoba kuchicheka igazi elinengi kakhulu elifaniswa lamanzi egeleza emfuleni.
Abantu bahlezi bekhala ngoba kuthiwa inyembezi zihlala zijuluka. Kukhalwa nje kukhalelwa izihlobo. esezafayo zedlula emhlabeni zidluliswa yikuhlala zisevalweni zisesaba zona zimpi lezo. Bahlezi bebaleka abantu inyawo sezitshone esiswini ngenxa yokubalekela amabutho. Izandla lazo sezitshona esifubeni ngenxa yokuthwala impahla zemuli yakhe.
Impahla lezi uzisusa kwenye indawo ezisa kwenye indawo. Ubaleka nje ubalekisa umphefumulo wemuli yakhe.
Iyakhala imbongi isithi, “Satsh’ thina ngay’ i Africa ebasel’ impi ivuthe ngamandla.” I-Africa kukhanya yiyo etshutshisa izimpi. Imbongi ikhala ngokuthi kayidede i-Africa, bayithanda ingelampi. Into edanisayo nge-Africa yikuthi lanxa beyicela ukuthi idedise impi yona iqhubekela phambili iyikhuthaza. Sebeze bediniwe ngokubona inkakhayi, amathambo abantu abafayo.
Iyakhala imbongi ihlaba umkhosi ngazo izimpi lezi. “Satsha thinabo!” Imbongi isize isithi ngcono iyiphe ibizo lindawo elithi “Kukompi kayideli” isitsho ukuthi izimpi kazipheli kulelo lizwe. Iyaphambili imbongi ithi yona bayithanda ilokuthula ingelayo impi. Ngokucunuka imbongi icela ukuba ivunyelwe ukuyipha igama lindawo abeseyibiza ngokuthi kuKompi kayideli. Lokhu kutsho ukuthi izimpi kazipheli eAfrica.
Ngenxa yezimpi imbongi ithi eAfrica kugeleza igazi okwamanzi emfuleni. Isebenzisa isichasiso lapha imbongi esithi:
“Igazi lichitheka kokuphela okwamanz’egelez’emfuleni”. Imbongi isebenzisa inhlonipho ikhuluma ngezihlobo zabo ezafayo kodwa ethi esezidlule ezweni. Isebenzisa ihaba njalo imbongi nxa iveza ukuthi ngenxa yempi abantu bagijima njalonje ithi inyawo sezitshona esiswini ngenxa yokubalekela amasotsha.
Kayipheli impi eAfrica okucunula imbongi ikuveza ngesibabazo esithi, “Satsha thina!”
Online Reporter