adminIKAIZER Chiefs isingasivikela ngempumelelo isicoco se-Absa Premiership, ngokutsho komqeqetshi waleli qembu uSteve “Mphathi” Komphela.
IZimpofana zidlale ngokulingana ngo 0-0 leMamelodi Sundowns emdlalweni weligi eFNB Stadium ngempelaviki.
IChiefs izadibana leBloemfontein Celtic emdlalweni weligi eFree State Stadium ngeSonto ezayo.
“Nxa sikhangelisisa imiklomelo esilayo uzabona ukuthi asikude. Nxa ukhangele njalo imidlalo engu-13 esesiyidlalile bese ubala imklomelo emibili ngomdlalo ngamunye uthola angu-26. Nxa uphinda njalo, ungakwazi ukufika ku-60.
“Inkinga esibe layo ngeyokuthi onozinti kule imidlalo esidlale kuyo ngokulingana okubalwa kuyona oweJomo Cosmos, Maritzburg United leBloemfontein Celtic babe ngabadlali abavelele bosuku. Lokho kutshengisa ukuthi izinto zihamba kahle ngendlela esidlala ngayo,” kutsho uKomphela.
Uncome umdlali wakhe wasemuva uLorenzo Gordinho ngokudlala kahle wathi kufanele aqhubeke ngokuzehlisa.
Umdlali lo osemncane wenze umsebenzi omuhle emuva evimba ulaka lweSundowns njengoba enze isiqiniseko sokuthi abadlali abafana loKhama Billiat abazenzeli umathanda.
“Kufanele aqhubeke ngokuzehlisa abe esebenza nzima. Kwesinye isikhathi akukhangelwa iminyaka ebholeni kodwa kukhangelwa ithalenta njengoba amanye amaqembu amakhulu emhlabeni esenza. Ngeke ngithi usekulungele ukuthi adlale kuma-Olympic ngomsebenzi asewenzile kodwa kufanele azibekisele itikiti lokuya kule imidlalo,” kutsho uKomphela.
Ukhale ngesimo senkundla i-FNB wathi kodwa ayikho into engenziwa.
“Isimo senkundla senza ukuthi kube nzima kancane ukuthi udlale kuyo ngoba utshani bufitshane lebhola nxa ligqoma liya phezulu kakhulu kulokujwayelekileyo. Kodwa ayikho into esizoyenza ngoba isizini beyisavalile. Inkundla le ingenye yezinhle emhlabeni,” kutsho uKomphela.
Uthe iqembu bekufanele liwunqobe umdlalo walo leSundowns kodwa uGeorge Maluleka wayekela ithuba elihle.
“Bekufanele siwunqobe umdlalo lo. Isiminengi imidlalo esidlale ngokulingana lamanye amaqembu. Kodwa bekungumdlalo omuhle, besibagadile ukuthi bangasenzeli phansi. Womabili amaqembu abenganikezani amathuba.
“UMaluleka bekufanele enze sithole imklomelo emithathu, ngabe usebenzise ithuba alithole ngesikhathi ephaselwa ibhola nguSiphiwe Tshabalala kodwa kwalile. Angifuni ukuthi ngibeke isikhwili kumdalali lo,” kuqhuba umqeqetshi. — Ubulembu
Online Reporter