admin
Thokozile Mbedzi
KULEMULI yeWest Nicholson ehlaselwe yizigelekeqe ebezihlome ngombhobho emzini wayo ngoLwesibili yatshontshelwa imali engangeR200 000.
UNkosikazi Egneta Dlamini oleminyaka engu-61 uhlaselwe yizigelekeqe lezi ebusuku elele emzini wakhe eJonsly ngehola letshumi ebusuku.
Oguluva laba kubikwa bafike bakwatula isivalo salapho obekulele khona uNkszn Dlamini bamkhiphela phandle labanye akade besendlini.
Kubikwa ngemva kwalokho badubula kabili phezulu andubana bamlaye ukuthi ayothatha imali yonke abanike.
UNkszn Dlamini kubikwa wangena ephaphatheka endlini wayathatha imali khonokho wabesephendukile wabaqhubela.
Ekhuluma lentatheli kaMthunywa uNkosazana Fikile Ndlovu uveze ukuthi balokhe bedidekile ngesiga esenzakale ebusuku njalo lokhe betshotshobele.
“Lokhe sididekile ngesiga esenzakale lapha ebusuku njalo lokhu sitshaqeke imzimba ngoba siyizwile imbhobho ikhala komakhelwane. Sesabile ukuyafika khona ngoba lathi besingazithezela olulenkume kodwa sihle sazi ukuthi kukhona osekuthatha indawo koMama uMaDlamini ngoba ulomgodi,” kulandisa uNkszn Ndlovu.
Kuzwakale ukuthi izigelekeqe lezi bezigqoke amawovorosi alombala oyisibhakabhaka alama-reflectors. Lokhu sekusenza sihlalele evalweni ngoba asazi ukuthi khathesi bazangena ngaphi futhi kasikwazi lokuthi ngobani,” kulandisa uNkszn Ndlovu.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uvumile wathi solufikile ewofisini yabo njalo uzulu kangahlali lemali enengi endlini.
“Udaba lwamadoda amane ahlasele ethwele imbhobho abaleka lemali engange R200 000 solufikile ewofisini yethu sithanda ukuxwayisa uzulu ukuba engabohlala lemali enengi endlini kodwa bayoyigcinisa emabhanga njalo izikhathi zokuhambisa izimali zingaziwa ngabanye abantu zibe yimfihlo ngaso sonke.
“Sicela uzulu ukuba ongabe elolwazi ngezigelekeqe lezi azise amapholisa aseduzane loba ngokutshaya ucingo,” kuphetha uInsp Mangena.
Online Reporter